Kryetari i Partisë Demokratike, Sali Berisha, deklaroi se PD mbështet plotësisht protestën qytetare dhe kërkesat e saj, duke theksuar se largimi i kryeministrit Edi Rama dhe krijimi i një qeverie teknike për zgjedhje të lira janë prej kohësh edhe kërkesa të opozitës.
Gjatë një bashkëbisedimi me qytetarët në rrjetet sociale, Berisha u shpreh se do të ishte "tradhti e lartë" të mos mbështeteshin të rinjtë që protestojnë, duke shtuar se PD nuk do të ndikohej nga, sipas tij, "thirrjet e opozitës së opozitës apo grupeve të paguara nga George Soros".
"Pesë kërkesat e protestuesve janë kërkesa që PD i ka mbrojtur prej vitesh. Kryekërkesa e protestës, largimi i Edi Ramës dhe një qeveri teknike për zgjedhje të lira e të ndershme, është prej 3-4 vitesh edhe kërkesa jonë kryesore", tha Berisha.
Ai theksoi se Partia Demokratike ka zgjedhur të mos e politizojë protestën, duke respektuar karakterin e saj qytetar.
"Kjo nuk është protestë e Partisë Demokratike dhe ne nuk kemi bërë as përpjekjen më të vogël për ta ngjyrosur politikisht. Megjithatë, me qindra e mijëra demokratë, përfshirë deputetë dhe drejtues të PD-së, kanë marrë pjesë në të si qytetarë të thjeshtë. Ne do ta mbështesim këtë lëvizje pa ndërhyrë në organizimin e saj", u shpreh kreu i opozitës.
Berisha tha gjithashtu se mijëra demokratë kanë qenë të pranishëm çdo natë në protestë, duke theksuar se PD e respekton dhe e mbështet pa kushte këtë lëvizje qytetare.
Në fund, ai i drejtoi një mesazh kryeministrit Edi Rama.
"Mesazhi im për Edi Ramën është: jep dorëheqjen para orës 19:00, në mënyrë që Shqipëria dhe shqiptarët të festojnë lirinë e tyre dhe 250-vjetorin e Pavarësisë së aleatit tonë strategjik, Shteteve të Bashkuara të Amerikës. Jep dorëheqjen, mos prit të të heqin", deklaroi Berisha.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
