Pas një rezultati pozitiv në zgjedhjet e fundit parlamentare në Serbi dhe pas një marrëveshje historike në Maqedoninë e Veriut, me sa duket edhe shqiptarët etnikë në Malin e Zi janë në rrugën e duhur për të arritur një tjetër progres.
Mësohet se pjesa më e madhe e forcave politike atje kanë arritur të formojnë një koalicion të quajtur Lista Shqiptare për të garuar se bashku në zgjedhjet parlamentare të 30 gushtit.
Bashkëpunimi i pjesës më të madhe të faktorit shqiptar në Malin e Zi erdhi edhe falë angazhimit të diasporës shqiptare me qendër në SHBA.
Në koalicionin e Listës Shqiptare bëjnë pjesë Forumi Demokratik, Forca Lëvizja Civile për Perspektivë dhe Unioni i Tuzit.
Nik Gjeloshaj një prej liderëve të Listës Shqiptare, që në fund të vitit të kaluar fitoi garën për kryetar të Bashkisë së Tuzit, u bën thirrje shqiptarëve që të votojnë për partitë kombëtare.
Përmes një shënimi në Facebook, ai thotë se ky është një moment historik pas fitimit të Tuzit.
Genci Nimanbegu, zv.presidenti i partisë Forca, thotë se shqiptarët kanë mundësi unike që pas zgjedhjeve të fund gushtit të bëhen faktor politik në Malin e Zi.
Pavarësisht se dy parti shqiptare kanë formuar koalicion më vete, diaspora shqiptare ka bërë thirrje për të mbështetur vetëm Listën Shqiptare.
Shqiptarët përbëjnë rreth 5% të popullsisë prej 620 mijë banorë. Shumica e tyre jeton kryesisht në Tuz, afër kryeqytetit dhe Ulqin. Në të dy këto qytete, partitë shqiptare drejtojnë pushtetin lokal.
Në zgjedhjet e fundit parlamentare të mbajtura në fund të vitit 2016, partitë shqiptare garuan të ndara duke marrë gati 10 mijë vota, që përbën gjysmën e elektoratit shqiptar në Malin e Zi.
Zgjedhjet e 30 gushtit do të jetë procesi i shtatë zgjedhor që prej shpalljes së pavarësisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
