Begaj në Tropojë: Institucionet të bëjnë çmos për t’iu ardhur në ndihmë bizneseve dhe familjeve

Presidenti Bajram Begaj u ndal ditën e sotme në Tropojë, ku fokusi i vizitës ishte diskutimi për problemet dhe perspektivën e zhvillimit lokal

Zëri i shqiptarëve duhet të dëgjohet kudo që ata janë edhe në zonat më të largëta. Askush nuk duhet të ndihet i harruar apo i lënë mënjanë nga institucionet shtetërore, pushteti vendor duhet gjithashtu të bëjë çmos për t’i ardhur në ndihmë çdo individi, familjeje apo bizneseve që përballen me vështirësitë ekonomike. 

Kështu tha kreu i shteti gjatë takimeve me përfaqësuesit e pushtetit vendor dhe komunitetit. 

Gjatë takimit me kryetarin e Bashkisë Tropojë, Rexhë Byberi, Begaj diskutoi lidhur me sfidat dhe vështirësitë me të cilat përballet komuniteti si dhe bashkia. 

Garantimi i të drejtës së pronës si dhe përditësimi i hartës së pronësisë është një parakusht për zhvillimin e mëtejshëm të turizmit si dhe nxitjen e sipërmarrjeve në këtë zonë.

Duhet të krijojmë mundësitë për të mbështetur të rinjtë të projektojnë të ardhmen e tyre këtu. Sfidat mund të zgjidhen vetëm përmes bashkëpunimit ndërinstitucional.

Është e rëndësishme të sigurohet infrastruktura shkollore, të sigurohet shërbimi shëndetësor edhe në zona të largëta, të vazhdohet të investohet në turizëm, duhet patur gjithnjë kujdes që identiteti i zonës të mos humbasë.

Gjatë vizitës në gjimnazin “Asim Vokshi”, ai tha se takimi me të rinjtë, sidomos në kushtet e shkollës, plot dëshirë për dije e për të krijuar një të ardhme dinjitoze, i jep pafund energji dhe mbush me shpresë për Shqipërinë e së nesërmes. 

Në përfundim të vizitës së tij në Tropojë, Presidenti Begaj vizitoi parkun Kombëtar të Valbonës dhe u takua me përfaqësuesit e biznesit.

Parku Kombëtar i Luginës së Valbonës është një perlë natyrore që pak nga pak po zbulohet me madhështinë e saj për të apasionuarit e natyrës kudo në botë. 

Bujtinat mikpritëse që më është dhënë rasti të vizitoj nga afër, janë shembulli më i mirë se përse Tropoja duhet të vazhdojë të fokusohet tek turizmi, veçanërisht në modele të qëndrueshme të zhvillimit të turizmit.

Sigurimi i energjisë, legalizimi i pronës si dhe infrastruktura ishin ndër sfidat që të pranishmit në takim evidentuan si më parësoret e që duhet të marrin një zgjidhje sa më të shpejtë. Në këtë drejtim, Presidenti Begaj i garantoi përfaqësuesit e biznesit se do të përcjellë shqetësimet e tyre aty ku është e nevojshme për të marrë një zgjidhje.