U përfol se do drejtojë grupin parlamentar të PD, Alibeaj mohon zërat

Anëtar i Kryesisë së PD Enkelejd Alibeaj ka mohuar zërat se do të jetë pikërisht ai drejtuesi i grupit parlamentar të PD sesionin e ardhshëm.

Në një intervistë për MCN TV, Alibeaj tha se sesioni i ardhshëm do të jetë betejë e të gjithë grupit dhe se misionin e kësaj beteje e përcakton vendi.

“Unë nuk e kam dëgjuar këtë dhe nuk ka fare rëndësi. Kjo do të jetë një betejë e grupit parlamentar të opozitës në parlament. Misionin e betejës e përcakton vendi. Qoftë edhe më skeptiku e kupton fare mirë se procesi nuk kishte të bënte me votën e lirë të shqiptarëve. Administrata dhe krimi bashkë me shtetin zbritën dhë u vunë përballë opozitës. Ai nuk ishte rezultat zgjedhor, por vjedhje e zgjedhjeve. Kjo nuk është betejë vetëm për opoztën por për të gjithë, ishte grabitje e demokracisë”, tha Alibeaj.

I pyetur nëse do ofrojë propozime konkrete PD në vijim të reformës Zgjedhore, për ç’ka mazhoranca ka paralajmëruar se do të nisë menjëherë punën në sesionin e ri, Alibeaj tha se maxhoranca nuk mund të përcaktojnë axhendën zgjedhore të opozitës.

“Maxhoranca nuk mund të përcaktojnë axhendën zgjedhore opozitës. Ajo që ne do të bëjmë do jetë betejë e pastër me çfarëdolloj mjeti të ligjshëm. Nuk e përcakton axhendën një e ashtuquajtur maxhorancë. U bë i disati episod që ky njeri që qëndron në krye të qeverisë përdor instrumenta që nuk kanë të bëjnë me votën e lirë. Në 2016-ën përdori administratë, në 2017-ën e përdori bashkë me kanabisin, e përdori edhe në 2021-shin. Kjo do të thotë se ka vendosur që zgjedhjet ti konsiderojë si përballje të shtetit me opozitën në vend”, shtoi politikani.