“Humbje e madhe, politikan shembull”, Tafaj tregon komunikimin me Nishanin para se të shtrohej në Sanatorium (VIDEO)

Ish-ministri i Arsimit Myqerem Tafaj foli në edicionin e lajmeve në MCN TV mbi ndarjen nga jeta të ish-Presidentit Bujar Nishani.

Tafaj tha se kishte komunikuar me Nishanin 2-3 ditë para shtrimit të tij në Sanatorium, ku ish-Presidenti ishte shpresëplotë se do të bëhej mirë.

Tafaj e cilëson Nishanin një personalitet të rëndësishëm për vendin, një politikan shembull dhe një vendimarrës shumë të mirë. 

Kam komunikuar 2-3 ditë para se të shtrohej në Sanatorium. Mora vesh që kishte probleme në mushkri, ishte shpresëplotë që do ta kapërcente, por gjendja u agravua dhe u zhvendos në Gjermani. Për fat të keq nuk e përballoi. Pasojat e Covid kanë qenë të rënda. Kjo është humbje shumë e madhe, një ndarje e parakohshme, një personalitet i rëndësishëm për vendin, një politikan shembull. Kam bashkëpunuar dhe ruaj kujtimet më të mira. Një personalitet shumë i spikatur, një politikan që dëgjonte me shumë vëmendje, kishte për zemër argumentin dhe debatin me argumente. Kishte thjeshtësinë dhe ishte një vendimmarrës shumë i mirë, pasi kishte krijuar bindjet e veta. Drejtoi Presidencën me shumë dinjitet”.