Një ditë pas protestës të organizuar nga gazetarët të cilët kundërshtuan vendimin për përjashtimin nga komisionet parlamentare, Kuvendi i ka ftuar këta të fundit në një takim sqarues.
Pas letrës së drejtuar kreut të Kuvendit, Gramoz Ruçi, nga Unioni i Gazetarëve Shqiptarë, Kuvendi thekson se Sekretari i Përgjithshëm, Genci Gjonçaj, do të presë nesër në orën 11:00 të gjithë gazetarët.
“Në përgjigje të shqetësimeve tuaja për sistemin e ri Audio-Video të instaluar në Kuvend, shqetësime të ngritura edhe në letrën drejtuar Kryetarit të Kuvendit, z. Gramoz Ruçi, nga Unioni i Gazetarëve Shqiptarë, ju ftojmë në një takim me Sekretarin e Përgjithshëm të Kuvendit, z. Genci Gjonçaj, nesër, ditën e premte, në orën 11:00, në sallën në katin e katërt të Kryesisë së Kuvendit”, thuhet në njoftimin e Kuvendit.
Kujtojmë se gazetarët kanë protestuar paraditen e djeshme përpara Kuvendit, kundër vendimit për të moslejuar median që të ndjekë fizikisht punimet e komisioneve parlamentare.
Ata e kanë quajtur vendimin “diskriminues” dhe theksuan se nuk do ta zbatojnë atë. Sipas tyre ky vendim prodhon censurë dhe duhet të kthehet pas.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
