Zgjedhja e kryeprokurorit, Meta: Duhet dialog mes palëve, jo vendime të njëanshme

Zgjedhja e prokurorit të përgjithshëm ka qenë tema më e nxehtë e debatit politik të ditëve të fundit. Pas deklaratave të maxhorancës dhe opozitës, por edhe thirrjes së ambasadorëve për arritjen e një kompromisi për një kryeprokuror të përkohshëm, ka ardhur edhe reagimi i kreut të shtetit.

Presidenti Meta ka shprehur qëndrimin e tij mbi palët dhe si garant i Kushtetutës në lidhje me këtë çështje.

Në deklaratën e tij, Meta thekson se zgjedhja e Prokurorit të Përgjithshëm është përgjegjësi e Kuvendit në respekt të Kushtetutës. Meta thekson se çdo hap i njëanshëm nuk do të ndihmonte në konsolidimin e institucioneve të drejtësisë.

“Sikurse ju e dini kjo është një përgjegjësi ekskluzive e Kuvendit të Shqipërisë. Si president, unë dua të nënvizoj, derisa kemi të bëjmë me një çështje të rëndësishme të një institucioni kyç të drejtësisë, që duhet respektuar Kushtetuta dhe fryma e saj. Është e rëndësishme që të ketë midis aktorëve kryesorë një dialog të shpejtë, të përgjegjshëm dhe të bazuar mbi standarde transparente për zgjidhjen e kësaj çështjeje, pasi çdo hap i njëanshëm nuk do t’i ndihmonte konsolidimit të pavarësisë së institucioneve dhe rritjes së besimit të institucionet e reja të drejtësisë”, deklaroi Meta.

Meta: Dekretimi i kreut të SHISH-it, vendim i vështirë që kërkon kohë

Meta ka dhënë përgjigje edhe në lidhje me vonesën e dekretimit të kreut të ri të Shërbimit Informativ Shtetëror. Në lidhje me propozimin e emrit të Helidon Bendos nga kryeministri Rama për këtë post, Meta tha se i duhet ende kohë.

“Duhet të kemi në konsideratë se një vendimmarrje e tillë është shumë e rëndësishme, e cila kërkon kohë. Presidenti duhet të jetë i bindur se një vendimmarrje përfundimtare siguron një institucion kaq të rëndësishëm të sigurisë kombëtare”, tha Meta.

Kreu i shtetit i bëri këto komente pas një konference të përbashkët shtypi me homologun malazez, Filip Vujanoviç, i cili ndodhet për një vizitë zyrtare në Tiranë.