Anëtarët e Partisë Socialdemokrate kanë mbajtur një aksion simbolik në urën e madhe në lagjen Lakrishtë në hyrje të Prishtinës.
Përveç ftesës për të marrë pjesë në protestë ata i kanë bashkangjitur në banerë foton e kryeministrit Kurti me hund si të Pinokios.
Përmes këtij aksioni nga PSD kanë bërë thirrje për protestën e 25 marsit për të kundërshtuar dakordimin e arritur në Ohër nga kryeministri Albin Kurti dhe presidenti serb, Aleksander Vuçiç.
Sekretari organizativ i kësaj partie, Nol Nushi me këtë rast tha se kryeministri Kurti është ai që ka organizuar protestat më të mëdha kundër Asociacionit e që vet e ka pranuar atë.
“Përmes këtij aksioni bëjmë thirrje për protestë. Hunda e gjatë e Kurtit tregon rrugën e mashtrimit dhe gënjeshtrave për dialogun. Protestat më të mëdha i ka organizuar ai kundër Zajednicës dhe ai e ka pranuar Zajednicën. Kurti është dorëzuar, e ka mashtruar elektoratin”, deklaroi ai.
Nushi i bëri thirrje edhe anëtarëve të LVV-së që të protestojnë më 25 mars.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
