Më 12 qershor të vitit 1999, pas 78 ditë bombardimesh nga Aleanca Veri-Atlantike ndaj caqeve ushtarake serbo-malazeze në Kosovë, në Serbi dhe në Mal të Zi, ushtarët e NATO-s hyn në Kosovë, duke i dhënë fund luftës dhe krimeve të Serbisë.
25-vjet më parë në Kosovë u vendosën 50 mijë ushtarë të NATO-s dhe bashkë me ta edhe administrata e përkohshme e Kombeve të Bashkuara.
Ushtarët e parë të NATO-s që hynë në Kosovë më 12 qershor ishin forcat speciale të Norvegjisë dhe ato të Shërbimit Special Ajror Britanik, duke u gjetur ballë për ballë me trupat e Rusisë të cilët një ditë më parë ‘befasisht’ kishin marrë Aeroportin e Prishtinës me qëllimin e ndarjes së Kosovës.
Hyrja e ushtarëve të NATO-s hapi rrugën e kthimit në shtëpitë, tokën dhe vendin e tyre mbi një milion shqiptarëve të Kosovës të degdisur refugjatë në dhjetëra vende dhe tre-katër kontinente të botës.
E në 25-vjetorin e çlirimit të Kosovës dhe hyrjes së trupave të NATO-s janë organizuar një sërë aktivitetesh nga institucionet e shtetit, ndërsa vendin e kanë vizituar ish kryeministri britanik Tony Blair, ish-sekretari i NATO-s, George Robertson, e figura tjera të rëndësishme që ndihmuan Kosovën.
Sot presidentja e vendit, Vjosa Osmani pret në takim edhe presidentin e Shqipërisë, Bajram Begaj.
Po ashtu në ora 10:00 do të mbahet seancë solemne e Kuvendit të Kosovës.
Organizimi kryesor është në ora 12:00, ku në nder të 25-vjetorit të çlirimit të Kosovës, bëhet parakalimi i njësive të Forcës së Sigurisë së Kosovës dhe të Policisë së Kosovës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
