Gjykata Kushtetuese e Shqipërisë dhe Gjykata e Lartë e Shqipërisë zhvilluan një takim të përbashkët me synimin për të forcuar dialogun gjyqësor dhe për të konsoliduar më tej kulturën juridike ndërmjet dy institucioneve.
Në fjalën e saj, kryetarja e Gjykatës Kushtetuese, Fiona Papajorgji, vuri në dukje rëndësinë e këtij bashkëpunimi për garantimin e koherencës në jurisprudencë dhe rritjen e sigurisë juridike.
Ajo theksoi se shkëmbimi i praktikave gjyqësore ndihmon në shmangien e interpretimeve të ndryshme, në qartësimin e standardeve për gjykatat më të ulëta dhe në mbrojtjen efektive të të drejtave themelore të individit.
Nga ana e tij, kryetari i Gjykatës së Lartë, Sokol Sadushi, u shpreh se kufijtë ndërmjet dy gjykatave përcaktohen nga mënyra e ushtrimit të kompetencave të tyre. Ai nënvizoi se respektimi i roleve përkatëse është thelbësor për ruajtjen e ekuilibrave institucionalë dhe për forcimin e besimit të publikut në sistemin e drejtësisë.
Gjatë takimit, gjyqtarët Marjana Semini dhe Asim Vokshi referuan mbi standardin kushtetues të arsyetimit të vendimeve gjyqësore dhe mbi parimin e sigurisë juridike. Diskutimet mes anëtarëve të të dyja gjykatave u zhvilluan në mënyrë aktive, duke nxitur një shkëmbim të dobishëm përvojash dhe qasjesh profesionale.
Ky aktivitet u mbështet nga Këshilli i Evropës në kuadër të projektit D-REX III, ku u theksua se, pavarësisht roleve të ndryshme, të dyja gjykatat ndajnë përgjegjësinë për të garantuar që drejtësia jo vetëm të zbatohet, por edhe të perceptohet si e drejtë dhe e besueshme nga qytetarët.
Në këtë kuadër, Gjykata Kushtetuese mbetet e përkushtuar për forcimin e bashkëpunimit ndërinstitucional dhe përmirësimin e vazhdueshëm të cilësisë së drejtësisë në vend.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
