Presidenti Ilir Meta u ka bërë thirrje shqiptarëve, duke risjellë dhe njëherë në vëmendje protestat e lidhura me rrëzimin e regjimit komunist. Sipas, postimeve që ka bërë në rrjetet sociale “Tëitter” dhe “Facebook”, ai kurrë nuk e kishte menduar se do të vinte sërish një ditë e ngjashme për të dalë në protestë e për të luftuar për pluralizmin politik, kushtetutën e demokracinë. “E duam Shqipërinë si gjithë Europa!”, do të jetë thirrja e protestës së nesërme, thotë Meta.
“Kurrë nuk e mendoja se pas 30 viteve do të vinte kjo ditë, që të ftoja më 2 mars të gjithë qytetarët e Shqipërisë, për të mbrojtur fitoren më të madhe të popullit tonë, pluralizmin politik, lirinë dhe demokracinë.
Vetëm paprekshmëria e Kushtetutës dhe ndëshkimi i merituar i puçistëve që e kanë dhunuar atë, do ta mbrojë popullin tonë nga instalimi i një regjimi tiranik njëpartiak dhe kleptokratik.
Po ndaj me ju disa emocione të miat kur një nga ish-drejtuesit kryesorë të Lëvizjes Studentore, Arben Imami më thërriste mua dhe disa studentë të rinj për të shkuar në përballjen finale me kupolën e diktaturës, që u detyrua të pranonte kapitullimin e regjimit më të pashembullt shtypës dhe izolues në kontinent.
Le ta dëgjojë nesër e gjithë bota demokratike thirrjen e popullit shqiptar: E DUAM SHQIPËRINË SI GJITHË EUROPA!”, shkruan presidenti Ilir Meta.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
