PD dhe LSI i rikthehen çështjes së qëndrimit të mbajtur nga qeveria shqiptare në lidhje me Jeruzalemin. Në fund të vitit të shkuar, opozita e akuzoi qeverinë në lidhje me votën në OKB pro rezolutës e cila dënon vendimin e presidentit amerikan për ta shpallur Jeruzalemin kryeqytet të Izraelit.
Në dhjetor, figura të opozitës deklaruan se me votën pro kësaj rezolute, Shqipëria doli kundër SHBA-ve. Ndërsa ministri i Jashtëm, Ditmir Bushati, e argumentoi votën pro rezolutës me faktin se “nuk ka një qëndrim të ri nga ana e Shqipërisë. Është i njëjti qëndrim që Shqipëria ka mbajtur në OKB. Qëndrimi është i njëjtë me atë të BE-së”.
Mesa duket, opozita ka vendosur t’i rikthehet kësaj çështjeje. Në një kërkesë drejtuar kreut të Kuvendit, një grup deputetësh të PD-së dhe LSI-së kërkojnë futjen në rendin e ditës të debatit si dhe shqyrtimit e miratimit në seancë plenare të projektrezolutës “Për ndyshimin e qëndrimit të mbajtur nga qeveria shqiptare mbi rezolutën “Për statusin e Jeruzalemit në OKB”.
Në dokumentin e dorëzuar në Kuvend, deputetët e opozitës kërkojnë zhvillimin një debati në Kuvend për ato që ata i quajnë “qëndrime të papranueshme të qeverisë shqiptare” mbi çështjen në fjalë.
Mes deputetëve që kanë firmosur kërkesën janë Tritan Shehu i PD-së, Petrit Vasili i LSI-së, Edmond Spaho, Aldo Bumçi, Nasip Naço, Klajda Gjosha, Përparim Spahiu, Viktor Tushaj, Genc Pollo, Lefter Koka etj.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
