Ministri i Brendshëm, Fatmir Xhafaj, ka dhënë dorëheqjen. Siç mësohet nga një postim i kryeministrit në “Tuiter”, vendin e Xhafajt do ta zërë gjeneral Sandër Lleshi.
“Pranova dorëheqjen e ministrit Xhafaj, të cilin e falenderoj për kontributin e çmuar.Gjeneral Sandër Lleshi do të sjellë një energji të re pozitive në krye të Punëve të Brendshme.Traseja është e shtruar.Tani duhet rritur shpejtësia dhe duhen arritur rezultate edhe më domethënëse”, shkruan Rama.
Fatmir Xhafaj ka qenë shpesh në qendër të akuzave sidomos muajt e fundit. PD-ja e ka akuzuar Xhafajn për implikimin e të vëllait, Agron Xhafaj, në trafikun e drogës.
Vendin e Xhafajt në kabinetin Rama do ta zërë Sandër Lleshi, i cili kohët e fundit ka mbajtur postin e këshilltarit të kryeministrit për mbrojtjen.
Lleshi ka qenë një nga 3 gjeneralët e shkarkuar nga presidenti Nishani në maj të vitit 2013. Vendimi i kreut të shtetit u pasua nga një debat i madh në media dhe një padi në gjykatë për shkarkim të pamotivuar, një gjyq që u fitua nga Lleshi.
Me një karrierë 35-vjeçare në Forcat e Armatosura, gjenerali Lleshi u bë i njohur edhe në politikë pak vite më parë, pasi emri i tij u propozua publikisht nga shkrimtari Ismail Kadare, si një ndër kandidatët për President të Republikës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
