Ambasadorja e Shteteve të Bashkuara të Amerikës (SHBA) në Tiranë, Yuri Kim, me anë të një postimi në median sociale Facebook, ka përkujtuar 30-vjetorin e vizitës së ish-sekretarit Amerikan të Shtetit, James Baker, në Shqipëri.
Vizita e tij ka qenë e para e një udhëheqësi perëndimor që pas fillimit të pluralizmit në Shqipëri.
“Pikërisht 30 vjet më parë, Sekretari i Shtetit Baker qëndroi me popullin shqiptar në Sheshin Skënderbej dhe tha: Ju jeni me ne dhe ne jemi me ju”, ka shkruar ambasadorja në llogarinë e saj në Twitter.
Sipas saj, shumë gjëra kanë ndryshuar që nga ajo kohë. Por ajo thekson faktin se marrëdhëniet SHBA-Shqipëri mbeten të njëjta.
“Shumë gjëra kanë ndryshuar që nga ajo kohë dhe ne jemi përsëri në një pikë kthese, por një gjë mbetet e njëjtë: Ju jeni me ne dhe ne jemi me ju!
Vizita e Baker-it do të përcillej edhe në një artikull të gazetës “The New York Times”.
Shqiptarët, të cilët për katër dekada ishin praktikisht të izoluar nga bota e jashtme, rrethuan autokolonën e Baker-it. Duart zgjateshin nga çdo drejtim për të prekur Sekretarin e Shtetit ose thjesht xhamat e makinës së tij.
Në dritaret e makinës do të vendoseshin petale lulesh, kjo për të bërë një lidhje me përfaqësuesin e Amerikës.
Baker do të theksonte faktin se, për aq kohë sa kishte qenë në politikë, kurrë nuk kishte parë diçka të tillë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
