Masa e arrestit në shtëpi e vendosur ndaj ish-kreut të Shërbimit Informativ Shtetëror (SHISH), Vlora Hyseni, ka rindezur diskutimet e ashpra dhe ka shkaktuar debate të forta mes deputetëve në Komisionin e Ligjeve.
Përfaqësuesit e opozitës kanë kërkuar ndryshimin e rendit të ditës, duke argumentuar se rënia e kupolës së inteligjencës shtetërore përbën një emergjencë kombëtare që nuk mund të anashkalohet nga Kuvendi.
Deputeti i PD-së, Oerd Bylykbashi, e ka cilësuar situatën si një skandal madhor që dëshmon inkriminimin e thellë të strukturave shtetërore. Ai ka bërë përgjegjës drejtpërdrejt kryeministrin për këtë situatë.
Rend dite sot, në çdo komision, në seancë plenare, është skandali i djeshëm. Kjo reforma që i sillni shqiptarëve për t’ia nxirë jetën shqiptarëve, ka për sfond skandalin e djeshëm, kreu i SHISH që arrestohet nga SPAK për lidhje me krimin e organizuar. Ky shtet është i krimbur nga koka te këmbët, ky Kuvend diskuton për seksin e engjëjve. Flet për gjërat që do t’ia bëjnë më keq jetën. Ky Kuvend duhet të mblidhet sot. Si ka mundësi që krimi i organizuar të jetë penetruar te SHISH, AKSHI, kadastra, ministritë, sistemi i prokurimit. Një shtet i rënë. Se mos ia vini fajin vetëm drejtoreshës është kryeministri. Ajo është një lungë e sistemit që është infektuar në të gjitha qelizat e veta, me një emër infeksioni, Edi Rama.
Në të njëjtën linjë, edhe deputeti demokrat Saimir Korreshi ka përdorur tone ironike për të përshkruar plogështinë e institucioneve përballë cenimit të sigurisë kombëtare, duke kërkuar reagimin e Presidentit të Republikës.
Mendova se kishte ardhur Bajrami për të mbledhur Këshillin e Sigurisë, se ka rënë shteti, kanë rënë siguresat gjithë. Ne vazhdojmë sikur këtu s’ka ndodhur asgjë, do bëjmë kooperativa të tipit lart, apo të mesëm, të tipit bujqësor. Ky Kuvend a ka ndonjëherë prioritete, kur bie siguria kombëtare. Sot kush e ruan shtetin tonë? Bajrami dini gjë ku është?
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
