Kreu i Partisë Demokratike doli para mediave sot për të falënderuar qytetarët që mbështetën dje protestën e opozitës. Në një prononcim në mesditë, Basha e cilësoi protestën e djeshme një vërshim popullor që përcolli mesazhin e shpresës.
“Vërshim popullor, qindra e mijëra qytetarë. Dua t’i falënderoj të gjithë. Bashkimi i djeshëm i shqiptarëve është mesazhi më i qartë se shqiptarët nuk e pranojnë më këtë gjendje. Ky bashkim gjigant vullnetesh i tregoi botës mbarë se në Shqipërinë që e njohin si vendi i drogës dhe korrupsionit të Edi Ramës, ka një popull që e do lirinë dhe demokracinë dhe është i gatshëm të punojë për ta arritur”, tha Basha.
Kreu i demokratëve tha se protesta e djeshme tregoi se qytetarët shqiptarë treguan dje se nuk pajtohen me gjendjen e vendit. Ai e cilësoi protestën një mbështetje masive për kauzën e opozitës.
“Është një mesazh i fuqishëm që tregon që shqiptarët kanë vendosur të mos ulin më kokën. Është një mesazh i fuqishëm mbështetjeje për opozitën, kauzën tonë antimafia, që do të shkëpusë lidhjet me krimin dhe përmes reformës zgjedhore të garantojë zgjedhje të lira. Falënderoj edhe ish-votuesit e qeverisë. Fitorja e kësaj beteje është një ogur i mirë për luftën në të cilën është angazhuar opozita. Jemi të vendosur e të qartë nga mesazhi i shpresës që dhanë dje shqiptarët”, tha Basha.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
