Kryeministri i Kosovës, Ramush Haradinaj, me ftesë të shefes së Bashkimit Evropian në Kosovë, Nataliya Apostolova, mori sot pjesë në takim pune me shefat e misioneve të shteteve anëtare të BE-së.
Me këtë rast, Haradinaj, kërkoi nga Shtetet e Bashkuara të Amerikës dhe vendet e Bashkimit Evropian që të mos e ndërlidhin vazhdimin e dialogut për normalizimin e marrëdhënieve me Serbinë me shfuqizimin e taksës doganore, të cilën Qeveria e Kosovës ua ka vënë importeve nga Serbia dhe Bosnje e Hercegovina.
“Është gabim pozicioni, edhe i Uashingtonit, edhe i evropianëve, edhe i Berlinit, edhe i Parisit, t’ia pranojnë kushtin Serbisë, heqjen e tarifës, për të vazhduar dialogun”, tha kryeministri Haradinaj.
Gjithashtu, në këtë takim, u diskutua për të arriturat dhe sfidat e Kosovës në rrugën evropiane, ku kryeministri Haradinaj theksoi se Republika e Kosovës është fuqimisht e vendosur për anëtarësimin në BE si prioritet i lartë i saj, gjersa vazhdon të punojë pandërprerë për të arritur zbatimin e plotë të MSA-së, dhe të respektojë obligimet e kontratës sonë të përbashkët.
“Qeveria është angazhuar plotësisht në përmbushjen e agjendës evropiane, duke ndërmarr me këmbëngulje reforma të gjithanshme, sidomos për fuqizimin e sundimit të ligjit”, shtoi Haradinaj, duke shtuar se për të ecur përpara dhe që të sigurohet paqja afatgjatë dhe e ardhmja evropiane për të dy shtetet, jemi të interesuar të arrihet marrëveshja përfundimtare ligjërisht e obligueshme midis Kosovës dhe Serbisë, që rezulton me njohje reciproke", tha Haradinaj.
Ndër tjerash, në takimin e sotëm, Haradinaj tha se ka një sinjal të qartë nga Bashkimi Evropian, se i respekton arritjet tona dhe se kemi mbështetjen e saj në mënyrë aktive, e që është realizimi në kohë optimale i lëvizjes së lirë për qytetarët e Kosovës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
