Rifat Latifi ka dhënë sot dorëheqje nga pozita e ministrit të Shëndetësisë së Kosovës.
Dorëheqja e tij ndodhi pas kritikave të vazhdueshme për keqmenaxhim të shëndetësisë kosovare.
Akoma nuk ka deklarim nga Qeveria, por mediat në Kosovë kanë publikuar letrën e dorëheqjes, në të cilën thuhet se dorëheqja vjen pas “shumë reflektimesh”.
“Me zhgënjim të thellë dhe keqardhje pas shumë reflektimesh për disa muajt e fundit po ju informoj se në mënyrë efektive iu ofroj dorëheqjen time nga posti i ministrit të Shëndetësisë të Republikës së Kosovës, se që nga sot me datën 6 tetor 2022”, thuhet në letrën e dorëheqjes.
Në letrën e tij, Latifi thotë se ka bashkangjitur raportin 10 mujor të gjeturave dhe sfidave si dhe të arriturat e tij gjatë kësaj periudhe.
Duhet kujtuar se javë më parë, kryeministri Kurti themeloi edhe një Komision për Shëndetësinë, të cilin e udhëheq vetë ai.
Krijimi i këtij komisioni i konsiderua nga shoqëria civile edhe si mosbesim ndaj punës së Latifit.
Ministri i Shëndetësisë është kirug që vepron e jeton prej shumë vitesh në Shtetet e Bashkuara të Amerikës.
Rifat Latifi në 2009 ishte emëruar këshilltar për Shëndetësi i kryeministrit të asaj kohe, Hashim Thaçi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
