Kryeredaktori i MCN TV, Leonard Mitro, tha në MCN Live se nëse Lulzim Basha ka këllqet le të krijojë një parti të re me deputetët që i shkojnë nga mbrapa. E njëjta gjë vlen edhe për palën tjetër, grupin e Rithemelimit, shprehet Mitro. Ai shton se prania e Bashës në politikë dhe ajo çfarë po ndodh sot në opozitë është një kusur i Berishës.
Lidhur me tensionet në mbledhjen e Kryesisë së PD, Mitro tha:
Nuk di ta përkufizoj këtë zotëri (Bashën) se çfarë qenie politike është realisht. Të gjithë e pamë si eskaloi mbledhja e Kryesisë së PD, Kolegjit të Kryetarëve nëse mund ta quajmë kështu, me njerëz të njohur të z.Basha si ish-shefi i Policisë Bashkiake Florenc Hoxha etj, gjithsesi shembulli më i keq që opozita po i jep publikut, elektoratit”.
Mitro tha se Basha la të kuptohet se është i përzgjedhuri i amerikanëve për të drejtuar opozitën, ndërsa u shpreh për marrëveshjen e 17 majit.
Në qoftë se z.Basha ka ambiciet e tij për t’u rikthyer në politikë, marrë shkas nga ato çka tha në një takim në Kamëz, ku renditi si meritë të tij marrëveshjen e 17 majit, duke thënë na i kërkuan ndërkombëtarët, na thanë ose bëjeni ose do keni pasoja, duke lënë të kuptohet se ky është i përzgjedhuri i të huajve, amerikanëve për të drejtuar opozitën. Nëse ky zotëri i ka këllqet për të krijuar një parti të madhe, të krijojë frymë, një opozitë të re, është shumë e thjeshtë, mund të krijojë një parti të re me mbështetësit që ka, deputetët që i shkojnë nga mbrapa. Kjo mund të vlejë edhe për këta të tjerët, për të dy palët. Z. Basha në politikë dhe ajo që po ndodh sot në opozitë janë kusuret e z.Berisha, të mënyrës si e ka drejtuar PD-në, që kur e solli z.Basha, prandaj jemi në këtë derexhe. Berisha e kishte shansin të dilte nga kostumi i vet, por nuk arriti të dalë dot, të hapte partinë, të hapte garën, të mos ishte njëshi sërish”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
