Avokati Spartak Ngjela thotë se me përfundimin e procesit të vettingut për gjyqtarët dhe prokurorët, do të fillojë zbatimi i reformës në drejtësi në radhët e pushtetarëve. Në emisionin “Studio e Hapur” me Eni Vasilin në “News24”, Ngjela thotë se nga muaji mars do të dalin edhe emrat në radhët e politikanëve që do preken nga reforma.
Ai thotë se niveli i korrupsionit në Shqipëri është i lartë, ndërsa shton se ndërkombëtarët kanë shfaqur interes për reformën në drejtësi, në mënyrë që t’i jepet fund këtij fenomeni.
Ngjela thotë se rreth 60 % e gjyqtarëve nuk do ta kalojnë vettingun, ndërsa shton se as politikanët dhe pushtetarët që shohim sot, nuk do t’i rezistojnë reformës në drejtësi.
I pyetur nëse preken nga kjo reformë edhe liderët kryesorë politikë në vend, ai thotë se ky proces do t’i prekë të gjithë.
PJESE NGA INTERVISTA
Eni Vasili: Rikthehemi tek dimri i politikanëve, po aty si është parashikuar
Spartak Ngjela: Unë mendoj që në mars nuk ka më njeri nga këta.
Eni Vasili: Nga këta, kush…
Spartak Ngjela: Që i shikoni sot në krye në politikën shqiptare.
Eni Vasili: Asnje?
Spartak Ngjela: Kreu mund të jenë 10, 20 ja dhe 30. Këta nuk do të jenë më.
Eni Vasili: Pra, Rama, Basha, Berisha…
Spartak Ngjela: A hyjnë në tri dhjetëshen Rama?! S’ka më njeri nga këta. Pse? Kështu ishte edhe në Kroaci, nuk munden dot më, nuk do t’i rezistojnë dot.
Eni Vasili: Po si do të largohen avokat? Si s’do jenë më? Rama është kryeministër i vendit, deri në mars nuk ka bërë akoma një vit nga mandati i dytë.
Spartak Ngjela: Këta i kanë bërë të gjitha përpjekjet, unë e kam denoncuar që duan të bashkohen. Njëherë bashkohen, njëherë ndahen, ju e shikoni, por e kanë kot. Nuk kanë këta eksperiencë se c’do të thotë perëndim. Dhe nuk e dinë se çdo të thotë drejtësi perëndimore dhe nuk e dinë se çdo të thotë ligj në perëndim. Shqipëria është në një pozicion të tillë që Washingtoni e do domosdoshmërisht në BE.
Eni Vasili: Po si do të ikin këta, me dorëheqje, a do t’i shkarkojnë?
Spartak Ngjela: Atë nuk e di unë le ta zgjedhin vetë, unë nuk e di. Unë e di që do të ikin me goditje penale. Kështu mendoj se do ikin me goditje penale.
Eni Vasili: Ju thoni që do shkojnë në burg.
Spartak Ngjela: Burgun nuk e kam unë në dorë, por duhet të zgjedhin avokat të mirë.
Eni Vasili: Ju do jua bëni avokatin?
Spartak Ngjela: Jo, asnjëherë. Ja ta deklaroj këtu.
Po jua them edhe njëherë. Problemi qëndron në faktin se ka një korrupsion gjigand në Shqipëri. Dhe e kanë pranuar të gjithë. Emra nuk kanë nxjerrë, por do t’i nxjerrin atëherë kur do bëhet presion, do të bëhet bllok kundër. Nuk ma merr mendja që politika e lartë perëndimore të nxjerrë emra, sepse ata i kanë emrat. Ata kanë një vit e ca që hetojnë politikën shqiptare, dhe i dinë të gjitha. Shërbimet nuk merren me gjyqtarët, institucionet e specializuara janë marrë me politikanët.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
