Një zbulim tronditës ka përfshirë Serbinë vetëm pak ditë përpara zgjedhjeve të parakohshme parlamentare të 25 tetorit.
Grupi kërkimor i Universitetit të Torontos, Citizen Lab, në bashkëpunim me organizatën serbe për të drejtat dixhitale "SHARE Foundation", ka konfirmuar me besim të lartë se telefoni iPhone i rektorit të Universitetit të Beogradit, Vladan Djokiç, është infektuar përmes softuerit mercenar të hakerimit, Pegasus.
Sipas ekspertëve, sulmi ka përdorur teknologjinë "zero-click" brenda vitit 2026, gjë që nënkupton se rektori nuk ka pasur nevojë të klikojë mbi asnjë link apo të hapë ndonjë skedar që programi të futej në pajisjen e tij.
Ky program spiun i jep hakerit akses të plotë në telefon, përfshirë mesazhet e koduara, mikrofonin dhe kamerën.
Rektori Djokiç e quajti këtë ngjarje "një tjetër përpjekje frikësimi", duke kujtuar se zyrat e tij u bastisën nga policia më 31 mars të këtij viti.
Raporti i Citizen Lab zbardh edhe një rast të dytë të rëndësishëm spiunazhi shtetëror.
Bëhet fjalë për Rade Bajić, një bashkëpunëtor i lartë prokurorial në Zyrën e Prokurorit Publik për Krimin e Organizuar në Serbi.
Bajić kishte punuar në hetimin e dosjes së bujshme të korrupsionit “Generalštab”, një projekt ndërtimi luksoz në ish-Shtabin e Përgjithshëm të ushtrisë në Beograd, i lidhur me kompaninë e Jared Kushner, dhëndrit të ish-presidentit të SHBA-së, Donald Trump.
Prokurori Bajić kishte marrë njoftime zyrtare kërcënimi nga kompania Apple më 13 dhe 27 gusht, të cilat e paralajmëronin se ishte shënjestruar nga spiunazhi mercenar.
Bajić u hoq papritur nga hetimi i kësaj dosjeje në nëntor të vitit 2025, ku u akuzua Ministri i Kulturës Nikola Selakoviç dhe në shkurt të vitit 2026 ai doli publikisht të fliste në një protestë të organizuar nga aktivistët studentorë.
Zgjedhjet e parakohshme parlamentare në Serbi u shpallën në shtator të këtij viti, pas gati dy vitesh protestash të pandërprera popullore e studentore.
Këto revolta masive morën hov fillimisht në nëntor të vitit 2024, kur shembja e çatisë së stacionit hekurudhor në Novi Sad la të vdekur 16 persona, duke shkaktuar një zemëratë të madhe popullore ndaj korrupsionit dhe mungesës së sigurisë në projektet publike të vendit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
