Kandidati për primaret në Bashkinë Durrës, Igli Cara, thotë se projekti i portit të Durrësit është një mega-skandal që dita-ditës po qartësohet.
Në një deklaratë për mediat ditën e sotme, Cara tha se “Durrës Yachts & Marina” nuk ka asgjë të përbashkët me emërtimin e projektit, ku qëllimi i vetëm është vjedhja duke shfrytëzuar pasuritë publike.
Pa transparencë dhe në errësirë të plotë ky projekt përfaqëson aferën më të madhe korruptive të kësaj qeverie. Durrësi është i lidhur ngushtë me portin, aq sa njihet ndër vite si qyteti-port.
Porti dhe qyteti janë dy anë të së njëjtës medalje. Përpara syve tanë po kryhet, jo vetëm një akt i paprecedentë i grabitjes së pronës publike, por dhe një akt i turpshëm mbi historinë dhe identitetin kombëtar.
Projekti që po na serviret, është projekti i babëzisë, sepse e keqja me këtë qeveri nuk ka kufi. Të vjedhësh me ligj është standardi i vendosur nga kjo qeveri!
Dëshmi është edhe nxitimi për ta miratuar me shpejtësi këtë projektligj, që fut ujë nga të gjitha anët.
Me gjuhën e shifrave afro 3.8 miliardë euro kundrejt një "fitimi" nëse mund të quhet i tillë prej 2% të xhiros vjetore, që investitori do mbledhë nga Marina.
Në kufijtë e të paimagjinueshmes! Shteti shqiptar vë në dispozicion rreth 800 mijë metër katrorë të Portit Aktual të Durrësit, ndërkohë që investitori do të investojë vetëm 76 milionë euro.
Një projekt i ndarë në dy faza, ku në fazën e parë nuk përmendet në asnjë rresht Marina, vetëm 4000 ndërtime.
280 vende ankorimi në Marinë, kundrejt mbi 8600 apartamente të tjera të planifikuara në vijim.
Për këtë ka nevojë Durrësi? A duhet shkatërruar nga themelet kjo nyje strategjike, duke e zëvendësuar me ndërtime?
Sipas tij, për fat të keq, atë që nuk na e bënë as pushtuesit, Durrësit dhe shqiptarëve po ia bën Rama.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
