Ministrat e rinj të kabinetit qeveritar “Rama” janë betuar këtë të premte para Presidentit Bajram Begaj. Ceremonia e betimit u zhvillua te Pallati i Brigadave, ku anëtarët e rinj të qeverisë vendosën dorën mbi Kushtetutën e Republikës së Shqipërisë, sipas protokollit shtetëror.
E para që u betua ishte Albana Koçiu, e cila mori detyrën e zëvendëskryeministres. Pas saj u betua ministri i ri për Evropën dhe Punët e Jashtme, Ferit Hoxha, ndërsa më pas ministri i ri i Brendshëm, Besfort Lamallari.
Ceremonia vijoi me betimin e ministrave të tjerë të emëruar në kuadër të ndryshimeve të fundit në kabinet.
Ndryshimet në qeveri u miratuan një ditë më parë në Kuvendin e Shqipërisë, në një seancë ku opozita nuk mori pjesë në votim. Deputetët opozitarë u ngritën në këmbë dhe bllokuan foltoren e Parlamentit në shenjë proteste gjatë procesit.
Ndryshimet në qeveri
Zv.kryeministre – Albana Koçiu (zëvendëson Belinda Balluku)
Ministër i Brendshëm – Besfort Lamallari (zëvendëson Albana Koçiun)
Ministër i Drejtësisë – Toni Gogu (zëvendëson Besfort Lamallarin)
Ministër i Infrastrukturës dhe Energjisë – Enea Karakaçi (zëvendëson Belinda Balluku)
Ministër i Mbrojtjes – Ermal Nufi (zëvendëson Pirro Vengu)
Ministre e Shtetit për Marrëdhënien me Parlamentin – Erjona Ismaili (zëvendëson Toni Gogun)
Ministër për Evropën dhe Punët e Jashtme – Ferit Hoxha (zëvendëson Elisa Spiropali)
Në përfundim të ceremonisë, ministrat e rinj nisën zyrtarisht detyrën në kabinetin qeveritar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
