Në 20-vjetorin e përfundimit të bombardimeve të NATO-s kundër forcave serbe, në Kosovë do të organizohen manifestime të ndryshme për shënimin e këdaj dite të madhe për historinë më të re të Kosovës.
Këshilli Organizativ për Shënimin e 20-vjetorit të hyrjes së trupave të NATO-s në Kosovë, ka bërë të ditur se Ish-presidenti amerikan, Bill Clinton, më 12 qershor do të vjen në Kosovë.
Madje është theksuar se Bill Clinton përpos që do t’i bashkëngjitet popullit të Kosovës në shënimin e 20 viteve të lirisë, ai edhe do të mbajë fjalim në Tubimin Qendror për shënimin e këtij 20-vjetori, transmetojnë mediat në vend.
Gjatë vitit 1999 SHBA-ja në krye me ish-presidentin Clinton kanë qenë akterët kryesorë në vendimin për bombardimin e ish-Jugosllavisë nga Aleanca Veriatlantike NATO që atëbotë udhëhiqej nga gjenerali i famshëm amerikan Wesley Clark.
Kjo është hera e katërt që Bill Clinton viziton Kosovën.
“Ftojmë të gjithë qytetarët e Kosovës të marrin pjesë në tubimin qendror, dhe të shfrytëzojnë këtë mundësi për të falënderuar Presidentin Clinton për lidershipin e tij në ndërtimin e paqes në Kosovë dhe përkrahjen e tij të vazhdueshme për paqe dhe stabilitet në tërë rajonin”, thuhet në njoftimin e Këshillit Organizativ për Shënimin e 20-vjetorit të hyrjes së trupave të NATO-s në Kosovë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
