Kryeministri i Kosovës, Albin Kurti pas takimit me partitë opozitare lidhur me situatën në veri të vendit, ka thënë se takimi me krerët e partive opozitare ka qenë shumë i mirë dhe njoftues për situatën politike dhe të sigurisë.
Ai është përgjigjur edhe kritikave të partive opozitare, se i njëjti nuk ka planë e nuk di çfarë të bëjë për situatën aktuale të krijuar në Veri.
Krerët opozitarë janë më shumë të pakënaqur, sesa mospajtues.
Nuk është e vërtetë se nuk dimë në çfarë rruge jemi duke shkuar, rruga jonë është rrugë e ligjshmërisë, kushtetutshmërisë, është rrugë e paqes edhe e sigurisë e cila bëhet në përputhje me mandatin tonë dhe në bashkërendim me miqtë, aleatët tanë perëndimorë.
Nuk është e vërtet që në këtë takim ka qenë sikurse takimet të cilët zhvillohen publikisht para mediave, përkundrazi ka qenë bashkëbisedim i hapur dhe serioz.
Shefi i ekzekutivit më tej ka bërë të ditur se Kosova është në koordinim dhe komunikim të vazhdueshëm me QUINT-in dhe Bashkimin Evropian, por jo vetëm.
Sipas tij organet e sigurisë janë ata që bëjnë vlerësime mbi veprimet dhe reagimet që Qeveria e Kosovës ndërmerr në Veriun e Kosovës.
Nuk bëhet fjalë për kurrfarë prishje të raporteve me ShBA-të, koordinimi komunikimi me QUINT-in me Bashkimin Evropian, ShBA-të, NATO-n, KFOR-in, EULEXI-in janë të vazhdueshme, andaj nuk është e vërtetë që ka kurrfarë cenimi të raporteve, përkundrazi ka dendësi të komunikimit dhe bashkërendimit.
Plani i veprimit është plan i veprimit të organeve tona të sigurisë dhe ato bëjnë vlerësimet mbi veprimet dhe reagimet që ne i bëjmë, gjithçka është duke shkuar sipas ligjit, sipas rregullave.
Ai më tej ka bërë të ditur se Qeveria e Kosovës nuk ka hequr dorë nga vendimi i shkallëzuar për çështjen e targave.
Pas 21 nëntorit, siç e kemi thënë duhet të kalohet te gjoba, siç e parasheh ligji, këto nuk janë vendime qeveritare, janë ligje shtetërore.
Për Kurtin, krerët e partive opozitare nuk kanë pasur kërkesë specifike për shtyrjen e vendimit për targat.
Nga ana tjetër, liderët opozitarë kanë deklaruar se nga kreu i ekzekutivit nuk kanë dëgjuar asnjë plan konkret për të dalë nga situata në të cilën ndodhet vendi, pas largimit zyrtarëve serbë nga institucionet e vendit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
