Rama e emëroi zëvendësministre/ PL për Silva Cakën: Na tha që do ndiqte Magjistraturën, por zgjodhi “shkollën” e korrupsionit

Partia e Lirisë reagoi ashpër pas emërimit të Silva Cakës si zëvendësministre e Brendshme, duke e akuzuar se braktisi vlerat e demokracisë për një “karrige të pavlerë në qeverinë e krimit”.

Zëdhënësja e PL-së, Jasmira Memelli, përmes një postimi në Facebook, e ka cilësuar këtë emërim si një akt të braktisjes së vlerave të lirisë dhe demokracisë në këmbim të një pozicioni në atë që ajo e quan “qeveria e krimit dhe korrupsionit”.

“Silva Caka ka më shumë se një vit që ka dhënë dorëheqje nga Partia e Lirisë, me pretendimin se do të ndiqte Shkollën e Magjistraturës. Por në fakt, rezultoi se ishte një aplikim për në ‘Shkollën’ e Korrupsionit, Krimit dhe Vesit,”  shkruan Memelli.

Sipas saj, emërimi i Cakës tregon qartë përkushtimin e saj jo ndaj sistemit të drejtësisë, por ndaj sistemit të pushtetit të korruptuar që, sipas PL-së, përfaqëson qeveria aktuale.

Kur dikush zgjedh të braktisë vlerat e Lirisë dhe Demokracisë për një karrige të pa vlerë në Qeverinë e krimit dhe të korrupsionit, nuk largohet nga Partia e Lirisë, por nga morali, integriteti dhe parimet. Nuk ndalojmë askënd të lëpijë atë që ka pështyrë, apo të pështyjë fytyrën e vet.

As të nëpërkëmbë edhe gjakun e familjes të derdhur për vlerat e shenjta të Lirisë. Këto janë zgjedhje personale, që flasin më shumë se çdo fjalë. Ka mbi një vit që S.C ka dhënë dorëheqjen për të ndjekur gjoja Shkollën e Magjistraturës, që në fakt rezultoi aplikim për në “Shkollën” e Korrupsionit, Krimit dhe Vesit.

Partia e Lirisë është më e vendosur se kurrë në mbrojtjen dhe jetësimin e kauzave të saj madhore ekzistenciale kombëtare, për të vazhduar pa kompromis luftën parimore dhe patriotike, krah për krah me opozitarët e vërtetë dhe me të gjithë shqiptarët e ndershëm, për t’i shkurtuar ditët regjimit kriminal të Edi Ramës që ka shpopulluar vendin dhe po rrjep pa mëshirë popullin me korrupsionin skizofrenik.