Konferenca e Kryetarëve u mblodh sot paradite për të vendosur për kalendarin 3-javor të punimeve të Parlamentit. Por deputetët e opozitës kërkuan dorëheqjen e kryetarit të Parlamentit që në nisje të mbledhjes. Në emër të PD-së, kreu i grupit, Edmond Spaho, kërkoi largimin e Ruçit, në lidhje me seancën e votimit të kryeprokurorit të përkohshëm, votim të cilin demokratët e konsiderojnë puç kushtetues. Ai akuzoi kryeministrin Rama se përmes kryeprokurores së re po mbron ish-ministrin Tahiri dhe zyrtarë të tjerë vendor që opozita i ka denoncuar shpesh për abuzime.
“Është bërë një puç kushtetues. Kryetari i Kuvendit duhet të japë dorëheqjen. Më 18 dhjetor u krye puç kushtetues, i urdhëruar nga Edi Rama, por i zbatuar nga Ruçi. Kryeprokurori duhej të zgjidhej me 3/5, i propozuar nga KLP dhe me veting. U emërua me 69 vota, nga PS-ja dhe pa vetting. Qëllimi i emërimit antikushtetues të kryeprokurorit është për të mbrojtur Saimir Tahirin nga akuza e trafikut ndërkombëtar të drogës, Vangjush Dakon nga përgjimet e shërbimeve të huaja për blerjen e votës nga kriminelët në këmbim të tenderave, Qazim Sejdinin për lidhjet me krimin e organizuar, pastrimin e parave dhe blerjen e zgjedhjeve. Opozita nuk mund të lejoje shkeljen e vazhdueshme të Kushtetutës dhe delegjitimimin e insititucioneve. Dorëheqja e Ruçit është hapi i parë i kthimit të normalitetit në Parlament”, deklaroi Spaho.
Pas kërkesës për largimin e Ruçit, deputetët e opozitës lanë sallën e mbledhjes. Ndërkohë, homologu i Spahos në kampin socialist e sheh këtë largim si frikë nga drejtësia. Në një postim, Balla u shpreh se opozita është bërë bashkë prej frikës nga drejtësia.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
