Dega e Partisë Socialiste në Kolonjë, me anë të një postimi në faqen zyrtare “Facebook”, ka reaguar pas denoncimit që ka bërë në polici shefja e financës në Drejtorisë së Shëndetit Publik në këtë qytet, Kristina Stoja.
Kjo e fundit pretendon se ishte kërcënuar me largim nga puna, nga shefja e burimeve njerëzore.
55-vjeçarja Kristina Stoja tha se është dhunuar barbarisht në ambientet e poliklinikës nga shefja e personelit Dorina Tallo, 30 vjeç. Ajo thotë se autorja e dhunës e ka kërcënuar me largim nga puna nëse ajo nuk votonte PS. Mësohet se 55-vjeçarja është simpatizante e LSI-së.
Partia Socialiste në Kolonjë thotë se ky rast është politizuar, por sipas tyre ka ndodhur për motive personale.
“Partia Socialiste Kolonjë shpreh keqardhjen e thellë për politizimin pa asnjë shkak e provë të një ngjarje me motive personale midis dy protagonisteve ne mjediset e Drejtorisë së Shëndetit Publik në Ersekë. Ne vijojmë punën për Shqipërinë qe duam, për të vazhduar misionin e qeverisjes së vendit nga Partia Socialiste për ndërtimin e shtetit. Të dëshpëruarve qe herë nxisin dhunë e herë vetë-viktimizohen i ftojmë të ruajnë qetësinë, dhe të presin me dashuri votën e shqiptarëve”, thuhet në reagimin e degës së Partisë Socialiste në Kolonjë.
Sakaq, policia ka nisur hetimet për rastin në fjalë duke proceduar penalisht në gjendje të lirë, 30-vjeçaren Tallo, dhe duke zbardhur të plota rrethanat e ngjarjes.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
