Korça po përgatitet të presë Festën e Birrës nga nesër në pesë ditë fantastike.
Edicioni i 17-të i eventit më të madh dhe më popullor i stinës së verës në Shqipëri do të zhvillohet nga data 16-20 GUSHT tek Terminali i Autobusëve në Korçë, njoftohet në faqen zyrtare të bashkisë.
Edhe ministri i Mbrojtjes, njëherësh drejtues politik i PS për qarkun e Korçës, Niko Peleshi ndau pamje nga një prej eventeve më të mëdha në Shqipëri, Festa e Birrës, e cila shënon këtë vit edicionin e 17-të.
Me impakt të madh në zhvillimin e turizmit dhe ekonomisë lokale, kjo festë, pritet të thyejë rekordet e vizitorëve që zgjedhin Korçën si destinacion.
Nga data 16-20 gusht, muzika fantastike e këngëtarëve më në zë shqiptarë si Elvana Gjata, Ylli Limani, Eugent Bushpepa, Endri e Stefi Prifti etj., do të shoqërojë këtë festë përgjatë të pesta netëve.
Atmosfera elektrizuese do të vijojë me retron e viteve ‘90 me grupet “No Mercy”, “La Bouche” etj., si dhe yjet e muzikës greke Despina Vandi dhe Keti Garbi.
Festa e Birrës ka arritur standarde të larta organizimi vit pas viti duke ridimensionuar format e argëtimit dhe të turizmit në vend.
Biletat e koncertit mund të blihen online dhe në çdo pikë Wester Union kudo në Shqipëri, si edhe në biletarinë e dedikuar në hyrje të festës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
