Javët Kulturore Ndërkombëtare 2022, një nismë e Ministrisë së Kulturës që sjell në Shqipëri tingujt, imazhet, aromat dhe shijet e 18 vendeve të botës, do të rifillojnë nga data 1 shtator.
Ministria e Kulturës ndau në rrjetet sociale një video informuese mbi sezonin e dytë të Javëve Kulturore Ndërkombëtare, një sezon që nis me Britaninë (1-11 shtator), për të vijuar me Suedinë (12-18 shtator), Egjiptin (19-25 shtator) dhe Kinën (26 shtator-2 tetor), ku kulmi i aktiviteteve do të jetë koncerti i shumëpritur i këngëtares së njohur ndërkombëtarisht, Rita Ora.
E konceptuar si një paradë kulturore ndërkombëtare, kushtuar bashkëpunimit kulturor, ky program dinamik e gjithëpërfshirës, do të krijojë një atmosferë të jashtëzakonshme e do të shpërndajë mesazhe paqeje dhe pranimi.
Gjatë muajit shtator e në vijim do të spikasin ndër të tjera, koncerte me muzikë klasike dhe moderne egjiptiane, performanca folklorike egjiptiane, festivali i kulturës kineze, performanca Taiji, ceremonia e çajit dhe ushqimit kinez, loja tradicionale cricket, koncerti i ABBA Tribute, si dhe koncerti i shumëpritur i këngëtares shqiptare të njohur ndërkombëtarisht, Rita Ora, si dhe një mori aktivitetesh të tjera do të na përfshijnë të gjithëve përgjatë muajit shtator!
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
