“Karnavalet” e Inva Mulës u shfaqen për katër natë radhazi në TKOB.
Pas 45 vitesh u rikthye atmosfera festive e Karnavaleve të Korçës në skenën e TKOB-së, një prodhim dinjitoz që mbart skenografi mahnitëse me kalldrëmet e qytetit dhe kostumografi që të kthen pas në vitet ’30.
“Karnavalet” kësaj here erdhën nën regjinë dhe kujdesin e veçantë të Inva Mulës, si një homazh kushtuar babait të saj, Avni Mula, i cili është kompozitori i veprës, si dhe Luigj Gurakuqit, libretisti.
Opereta erdhi përmes Orkestrës Simfonike profesioniste dhe Korit të TKOB-së, dirigjuar nga Elda Laro dhe Dritan Lumshi.
Ngjarja e viteve `30 të shekullit të kaluar, bazohet në një skenografi me imazhe grafike, që e tregon veprën me anë të projeksionit fragmentar të copëzuar në lëvizje, frymëzuar nga fotografi i madh, lindur në qytetin e Korçës, Gjon Mili.
Skenografia e parë paraqet shtëpinë e Nikollaqit, e krijuar me kuinta të cilat krijojnë idenë e rrugicave me kalldrëm të qytetit, e dyta është e gjitha e krijuar me telajo dhe mobilieri tipike të familjeve të pasura të qytetit, në kontradiktë më shpirtin e varfër të tyre, ndërsa e treta paraqitet me një sallon të dekoruar fiks për të shpallur fejesën e Afrovitit.
TKOB në faqen e saj në internet vlerësoi lartë punën dhe angazhimin një mujor për vënin në skenë të kësaj operete.
Falë një pune intensive prej më shumë se 1 muaji, jehoi në TKOB një perlë vizuale dhe lojë interesante, që shkriu në një humorin e hollë dhe linjën e dashurisë, duke përcjellë te publiku plot emocione të veçanta!
Opereta “Karnavalet” u vu në skenë për herë të parë më 5 shkurt 1978. Një vepër e repertorit kombëtar, e cilësuar si një nga më të çmuarat e këtij lloji ku gërshetohet humori i hollë i personazheve dhe mënyra e të jetuarit elegante korçare, të cilat kanë lënë gjurmë të rëndësishme në kujtesën e kulturës artistike dhe sociale të shoqërisë sonë.
Më 4 mars, “Karnavalet” do i rikthehen vendit të zanafillës në Korçë, duke përcjellë të njëjtën alegri edhe në teatrin “Andon Zako Çajupi”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
