Korça çel sot edicionin e 19-të të Festivalit Ndërkombëtar të Karnavaleve

Korça çel sot sezonin veror me një nga ngjarjet më të njohura kulturore të qytetit, Festivalin Ndërkombëtar të Karnavaleve 2026, i cili zhvillon edicionin e tij të 19-të.

Rrugët dhe sheshet e qytetit do të mbushen me ngjyra, muzikë dhe atmosferë festive, ndërsa pjesëmarrës nga Greqia, Rumania, Serbia, Polonia dhe komuniteti arbëresh do t’i bashkohen festës, duke e kthyer Korçën në një skenë të madhe kulture dhe argëtimi.

Mbi 25 grupe artistike nga Korça do të sjellin energjinë dhe kreativitetin e tyre në këtë aktivitet, ndërsa Qendra Rinore do të hapë dyert për fëmijët, të cilët do të kenë hapësirën e tyre festive me aktivitete argëtuese, pikturim në fytyrë (face painting) dhe surpriza të shumta.

Kryetari i Bashkisë së Korçës, Sotiraq Filo, ka ndarë në rrjetet sociale agjendën e festivalit, i cili nis në orën 11:00 dhe do të vijojë gjatë gjithë ditës, për t’u përmbyllur në mbrëmje me festën tradicionale në Pazarin e Vjetër.

Ju ftojmë të gjithëve të bëheni pjesë e kësaj atmosfere plot ngjyra, muzikë dhe gëzim, duke ndjekur programin e aktiviteteve gjatë gjithë ditës.

 

Ju presim të festojmë së bashku dhe ta mbushim Korçën me energji, buzëqeshje dhe ngjyra.

 

Sipas programit të publikuar, aktivitetet do të zhvillohen si më poshtë:

 

Ora 11:00 – Grupet e karnavaleve do të sjellin atmosferën festive në rrugët e qytetit, me itinerarin: Zona Këmbësore – Bulevardi “Republika”.

Ora 17:00 – 20:00 – Në Qendrën Rinore do të zhvillohen aktivitete për fëmijë dhe pikturim në fytyrë.

Ora 19:00 – Parada e Karnavaleve do të nisë nga Lëndina e Lotëve, për të vijuar përgjatë Bulevardit “Republika” dhe Zonës Këmbësore.

Ora 20:30 – “Carnival Party” në Pazarin e Vjetër, ku festa do të vazhdojë me muzikë live dhe atmosferën karakteristike të karnavaleve.

Festivali Ndërkombëtar i Karnavaleve mbetet një nga aktivitetet më të rëndësishme artistike dhe turistike të Korçës, duke tërhequr çdo vit mijëra vizitorë vendas dhe të huaj.