Nis nesër në Tiranë cikli i javëve ndërkombëtare të Kulturës

Në Tiranë çelet nesër cikli i javëve ndërkombëtare të Kulturës, që do të nis fillimisht me Francën.
Kryeministri Edi Rama ka njoftuar sot se cikli i parë vjetor i javëve ndërkombëtare të kulturës nis me Francën.

Shqipëria mikpret botën. Nis nesër me Francën cikli i parë vjetor i javëve ndërkombëtare të kulturës, një nismë e re e qeverisë shqiptare që do të krijojë çdo vit hapësira të reja njohjeje e komunikimi me vendet e kulturat e tjera.

Nga data 25 prill nis në Shqipëri programi i javëve kulturore, me pjesëmarrjen e përfaqësuesve nga 18 vende të botës e do të zgjasë përgjatë gjithë vitit.

Javët kulturore ndërkombëtare do të sjellin për 17 javë në Shqipëri një larmishmëri kulturash, traditash, por edhe një tryezë dialogu e shkëmbimesh.

Të parët që hapin këtë udhëtim janë francezët, për të vijuar me radhë me një program të unifikuar nën siglën e Bashkimit Evropian; më pas Shtetet e Bashkuara të Amerikës, Greqia, Italia, Izraeli, Spanja, Britania e Madhe, Suedia, Egjipti, Kina, Gjermania, Japonia, Austria, Turqia, Hungaria, Emiratet e Bashkuara Arabe, duke e përmbyllur me Kosovën, që kulmon në festat tona kombëtare.