Qendra Kombëtare e Librit dhe Leximit ka përmbyllur fazën e vlerësimit të dorëshkrimeve për Fondin e Krijimtarisë Letrare “Libri për Fëmijë” 2026, duke shpallur pesë gjysmëfinalistët që do të vijojnë garën për tre çmimet fituese.
Në këtë edicion u paraqitën 19 aplikime, nga të cilat 17 dorëshkrime u pranuan për shqyrtim pasi plotësuan kriteret e kërkuara, ndërsa dy aplikime u përjashtuan për shkak të mungesës së dokumentacionit.
Për të garantuar një proces të paanshëm, dorëshkrimet iu nënshtruan vlerësimit anonim. Nga materialet u hoqën të gjitha të dhënat identifikuese, si emri i autorit, titulli i veprës dhe shtëpia botuese, ndërsa secilit dorëshkrim iu caktua një kod identifikues përpara se t'i dorëzohej jurisë.
Juria e këtij viti përbëhej nga Flori Kasaj (kryetar), Rovena Rrozhani dhe Rudina Çupi, të cilët zhvilluan takimin përmbyllës të procesit të vlerësimit.
Pesë gjysmëfinalistët, të renditur alfabetikisht, janë:
Adelina Mamaqi – “Tregimet e Kalendarit” (Botimet Univers)
Aldo Mustafa – “Mbretëria e Humbur” (Botimet Univers)
Fatmir Gjestila – “Yjzana” (Shtëpia Botuese TOENA)
Teuta Toska – “Na Quajnë Motrat Qiriazi” (Shtëpia Botuese ALBAS)
Xhahid Bushati – “Plaku me Akullore” (Shtëpia Botuese MEDIAPRINT)
Nga këta pesë autorë do të përzgjidhen tre fituesit e Fondit të Krijimtarisë Letrare “Libri për Fëmijë” 2026. Sipas kalendarit të shpallur nga Qendra Kombëtare e Librit dhe Leximit, fituesit do të bëhen publikë më 24 korrik 2026.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
