Zbulime të reja në Akropolin e Butrintit/ Për herë të parë gërmohet muri rrethues i qytetit

Kërkimet arkeologjike në Akropolin e Butrintit po zbulojnë shtresa të reja dhe të panjohura të historisë së qytetit antik.

Në kuadër të projektit “Topografia Urbane e Butrintit në Antikitetin e Vonë dhe Mesjetë”, për herë të parë në historinë e kërkimit shkencor në këtë sit, fokus i gërmimeve është bërë muri rrethues i qytetit të sipërm. 

Ky kërkim synon të hedhë dritë mbi programet fortifikuese dhe organizimin urban të Butrintit në etapa të ndryshme të zhvillimit të tij.

Gërmimet e fundit ofrojnë të dhëna të rëndësishme stratigrafike që mundësojnë datimin e saktë të murit rrethues. 

Ky zbulim ofron një lexim më të qartë mbi ndryshimet urbane të Butrintit gjatë mijëvjeçarit të fundit të jetës së tij, konkretisht midis shekujve V dhe XV të erës sonë.

Projekti është ndërmarrë nga Instituti i Arkeologjisë pranë Akademisë së Shkencave dhe mbështetet financiarisht nga Fondacioni për Menaxhimin e Butrintit.