Edicioni i 19-të i Festivalit Ndërkombëtar të Filmit për të Drejtat e Njeriut nisi dje në Akademinë e Filmit dhe Multimedias Marubi dhe do të vazhdojë deri më 21 shtator.
Artistë, kineastë, shkrimtarë dhe diplomatë morën pjesë në ceremoninë e hapjes në të cilën drejtori ekzekutiv Kujtim Çashku, prezentoi temën e sivjetshme të festivalit, “Vepro gjelbër tani dhe për të ardhmen”.
Ambasadori i BE në Tiranë, Silvio Gonzato u shpreh se në një botë të polarizuar, kinemaja ofron një mundësi unike, për të zhvilluar humanizmin dhe për të marrë veprime kolektive për të mirën e përbashkët, ndaj nuk është rastësi që Bashkimi Europian është partner i festivalit.
41 filma nga vende të ndryshme, me fokus të drejtat e njeriut, do të shfaqen falas për publikun në vendndodhje të ndryshme të qytetit.
Filmi suedez “Blix not bombs” nga Greta Stocklassa çeli siparin duke sjellë në vëmendje rolin e diplomatit Hans Blik në raportet mbi Irakun në vitet 2000 dhe çështjen e armëve të shkatërrimit në masë.
41 filma do të shfaqen në Tiranë, në COD, te Marubi, në kinemanë “Maks Velo”, te Akademia e Sigurisë, te shkolla e Magjistraturës, te Autoriteti i dosjeve etj, duke sjellë në vëmendje përmes këtij festivali perceptime dhe reflektime, mbi njeriun, ligjin dhe shtetet.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
