Një zbulim i rëndësishëm arkeologjik është bërë në zonën e Bushatit, ku janë evidentuar gjurmët e një tempulli të madh që i përket periudhës së antikitetit të vonë.
Kërkimet arkeologjike u realizuan nga Universiteti i Tiranës (Departamenti i Arkeologjisë dhe Trashëgimisë Kulturore) dhe Universiteti i Varshavës (Qendra e Kërkimeve për Europën Juglindore në Antikitet), në bashkëpunim me Drejtorinë Rajonale të Trashëgimisë Kulturore Shkodër.
Gërmimet u përqendruan në akropolin e qytetit antik, që daton në shekujt IV–I para erës sonë, ku u zbuluan gjurmët e një tempulli të madh, pjesë të murit rrethues të qytetit, si dhe një ndërtesë e periudhës së antikitetit të vonë.
Sipas arkeologëve, këto zbulime sjellin informacion të rëndësishëm për shtrirjen urbane të qytetit, arkitekturën e ndërtesave publike dhe për fazat e mëvonshme të përdorimit të këtij vendbanimi ilir.
Vendbanimi i Bushatit, i shpallur së fundmi zonë e mbrojtur arkeologjike, pritet të pajiset së shpejti nga DRTK Shkodër me sinjalistikë orientuese për vizitorët.
Qyteti antik i Bushatit, i njohur nga arkeologët kryesisht si “Bushati i lashtë” ose ndonjëherë i lidhur me qytetin antik të Lissit, ndodhet në kodrat pranë fshatit Bushat, rreth 15 km në jug të Shkodrës, pranë lumit Drin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
