Këshilli i Ministrave ka miratuar vendimin për shpalljen e Parkut Arkeologjik të Apolonisë si pasuri kulturore e paluajtshme, duke përcaktuar njëkohësisht kufijtë, zonifikimin dhe planin për ruajtjen, mbrojtjen dhe administrimin e tij.
Sipas vendimit, statusi i ri i jepet Parkut Arkeologjik të Apolonisë në përputhje me hartën e zonifikimit dhe koordinatat në Kornizën Referuese Gjeodezike Shqiptare (KRGJSH), të cilat janë pjesë përbërëse e këtij akti.
Gjithashtu, qeveria ka miratuar planin për ruajtjen, mbrojtjen dhe administrimin e parkut, me synimin për të forcuar mbrojtjen e trashëgimisë kulturore dhe për të përmirësuar menaxhimin e një prej siteve arkeologjike më të rëndësishme në vend.
Autoriteti Shtetëror për Informacionin Gjeohapësinor është ngarkuar me publikimin e hartës së re në Gjeoportalin Kombëtar, ndërsa Agjencia Shtetërore e Kadastrës do të kryejë regjistrimin e vendimit në përputhje me legjislacionin në fuqi.
Për zbatimin e vendimit ngarkohen Ministria e Turizmit, Kulturës dhe Sportit, Njësia e Administrimit dhe Koordinimit të Parkut Arkeologjik të Apolonisë, si dhe Bashkia Fier.
Vendimi hyn në fuqi pas botimit në Fletoren Zyrtare.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
