28 janar-07 shkurt/ Nis Java Kulturore Zvicerane në Tiranë  

Java Kulturore Zvicerane 2025 ka nisur mbrëmë, duke ofruar një program të pasur nëntëditor, që shfaq krijimtarinë artistike të komunitetit të pavarur kulturor të Shqipërisë dhe nxit dialogun mbi çështjet sociale.

Aktiviteti i parë i kësaj jave ka nisur në Piramidën e Tiranës, me organizimin e Ambasadës Zvicerane dhe Fondit Kulturor Zviceran (SCF).

Ambasadorja zvicerane në Shqipëri, Ruth Huber, ka theksuar rëndësinë e kësaj nisme, duke nënvizuar fuqinë e kulturës dhe artit për të nxitur ndryshime pozitive.

Ky aktivitet përfshin veprat e artistëve shqiptarë të mbështetur nga SCF dhe është një partneritet që fokusohet në tema të rëndësishme si mësimet nga e kaluara, barazia gjinore dhe qëndrueshmëria mjedisore.

Java Kulturore Zvicerane e këtij viti ofron një sërë ngjarjesh të pasura, përfshirë shfaqje në muzikë, teatër dhe kërcim, të cilat prekin dinamikat sociale dhe kulturore të Shqipërisë.

Ekspozitat do të eksplorojnë ndikimin e konsumerizmit në mjedis dhe rindërtimin e Pazarit të Vjetër të Tiranës. Gjithashtu, do të zhvillohen panele dhe diskutime që trajtojnë tema urgjente si vlera e ujit, përfaqësimi gjinor në industritë krijuese dhe trashëgimia e propagandës komuniste në Shqipëri.

Programi i ngjarjeve përfshin:

• 29 janar: Shfaqja “Mbi Peizazhe Ujore” – një shfaqje kërcimi dhe diskutim mbi vlerën e ujit.
• 1 shkurt: Premiera e dramës “Midis Nesh” – që eksploron marrëdhëniet nënë-bijë.
• 7 shkurt: Çeljet e ekspozitës “Horizonte të Ndotura” – një ekspozitë e artit digjital që trajton qëndrueshmërinë mjedisore.

Që nga viti 2017, SCF ka luajtur një rol kyç në mbështetjen e artistëve të pavarur dhe praktikuesve të kulturës në të gjithë Shqipërinë.