Banksy godet në shenjë sërish (FOTO)

Për 10 ditë rresht, protestat e Extinction Rebellion-it kanë bllokuar qendrën e Londrës me mijëra njerëz që kanë dalë nëpër rrugë për ndërgjegjësim rreth ndryshimit të klimës.

Sot shenjohet mbyllja e dhjetë ditëve protesta  dhe ndoshta për ta shenjuar këtë rast, një murale e dyshuar si e Bansky-t është shfaqur në Marble Arch.

Këtë mëngjes, kalimtarët rrethuan veprën artistike, duke mbajtur radhë për të pozuar dhe për t’u fotografuar me atë që dyshohet të jetë vepra e Bansky-t.

Çfarë simbolizon kjo murale?

Vepra e veçantë me stensil që ne të gjithë e shoqërojmë me artistin enigmatik të grafiteve shfaq një fëmijë të gjunjëzuar që mban një orë rëre simbolike. Në këmbët e saj gjendet një grumbull balte me një bimë që po rritet prej saj dhe një shpatë, duke gërmuar në tokë.

 Ky stil i artit të errët të rrugës është tipik i Bansky-t, pra jo më kot hamendësohet që ai është autori i veprës. Ngjitur me stensilin, në kalk janë shkruar këto fjalë:  “Që nga ky moment, dëshpërimi mbaron dhe taktika fillon”.

Ata që po i bënin foto veprës së Bansky-t kur u pyetën se çfarë mendonin për të u shprehën:

Kerstin Schork, një visitor nga Gjermania u përgjigj:  “Më kujton “Të premte për të ardhme”, e cila po nis në Gjermani. Këta fëmijë po dalin në protestë dhe e gjitha kjo ngjan si fëmijët në veprat e Bansky-t. Të rinjtë po frymëzohen nga Greta Thunberg.”

Protestuesi, Jamie Sheeran tha: “Arti nuk është krim, le të fillojnë taktikat”.

Ndër veprat më të famshme të Bansky-t në Londër janë “Qeni roje dhe Zëri i të Zotit” në Rivington Street në Shoreditch, famëkeqja “Graffiti Painter” me të kuqe të ndezur në Notting Hill dhe  “Nëse  Graffiti do të ndryshonte diçka, do të ishte ilegal” në Clipstone Street, Fitzrovia. Titulli i kësaj të fundit i referohet një thënieje të Emma Goldman-it, e cila protestonte për të drejtat e grave: “Nëse votimi do të bënte ndonjë ndryshim, do të ishte ilegal”. /sipas EuroNews, përgatiti Erina Çoku/