Mbrëmjen e së shtunës u mbyll festivali folklorik i Gjirokastrës. Artistët shqiptarë e të huaj veç se përcollën emocionet e pjesëmarrjes, e konsideruan këtë organizim të rëndësishëm për ruajtjen e traditës. Në një javë turistë të huaj dhe vendas mbushën kalanë e Gjirokastrës për të dëgjuar muzikë e për të parë vallet tradicionale shqiptare, por jo vetëm. Skena e festivalit ishte çdo ditë ndryshme, me interpretues të rinj dhe të vjetër, që veç këngës, sollën edhe veshjet tradicionale shqiptare. Në këtë edicion u vu re edhe prania e zërave të rinj të cilët interpretuan me shumë pasion dhe emocione këngët e zonës së tyre. Gjatë kësaj jave nuk munguan as grupet e huaja. Muzika napoletane ishte e pranishme në natën e fundit. Artistët të cilët e sollën këtë u shprehën shumë të emocionuar për pjesëmarrjen në Gjirokastër. Një koncert si ky i Gjirokastrës, vlerësohet shumë edhe nga artistët e trevave të Shqipërisë. Veç emocioneve që përcjell, thonë ata, mbajnë gjallë edhe të shkuarën dhe traditën e vendit. Festivali Folklorik u rikthye pas një mungese 8 vjeçare duke i dhënë Gjirokastrës shkëlqimin dhe gjallërinë e dikurshme. Ndryshe nga edicionet e tjera, këtë vit nuk u dhanë çmimet, si një mesazh se kënga tradicionale shqiptare është e bukur njësoj përgjatë të gjitha zonave.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
