Ministria e Arsimit dhe Sportit në prag të festave të nëntorit, ka shpallur konkursin e pikturës “Shqipëria ime 2021”.
Lajmi u bë i ditur nga ministrja e Arsimit dhe Sportit, Evis Kushi e cila ftoi të gjithë nxënësit në vend që të bëhen pjesë e konkursit, duke pasqyruar një moment të veçantë përmes pikturës, me motive nga historia dhe vlerat e Shqipërisë.
“Tashmë ky është një konkurs i përvitshëm tek i cili çdo nxënës nga i gjithë vendi është i ftuar të marrë pjesë duke dërguar foton e pikturës së tij/saj, e cila përcjell një peizazh, simbol apo moment të veçantë nga historia dhe vendi ynë i mrekullueshëm, plot vlera e bukuri. Foton e pikturës jeni të lutur ta dërgoni në adresën e e-mailit media@arsimi.gov.al deri më datë 5 nëntor, 2021 (ora 20:00) bashkë me të dhënat tuaja në emërtimin e fotos sipas formatit: emër mbiemër, klasa, shkolla, qyteti”, – tha Kushi.
Nga datat 8-12 nëntor do të publikohen 3 albume të ndryshme, në të cilat do të përfshihen fotot e pikturave të përzgjedhura, të ndara sipas klasave (klasat 1-5, klasat 6-9, klasat 10-12).
Kushi sqaroi se pikturat që do të marrin më shumë pëlqime në secilin album do të jenë edhe fituesit, pra në total do të kemi 3 piktura fituese, për të cilat do të akordohet edhe nga një çmim simbolik.
Pikturat më të mira do të ekspozohen në hollin e Ministrisë së Arsimit dhe Sportit, në një ekspozitë të hapur për të gjithë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
