Më 14 tetor të vitit 1929, u nda nga jeta rilindasi, etnologu, shkrimtari, arkeologu dhe kleriku Shtjefën Konstantin Gjeçov Kryeziu i njohur si at Shtjefën Gjeçovi, autori i veprës monumentale “Kanuni i Lek Dukagjinit”.
Ai u vra në fshatin Zym, në mes të Gjakovës dhe Prizrenit, nga policia e fshehtë serbe.
Me përfundimin e kolegjit françeskan në Troshan, në vitin 1888 nisi studimet në Kroaci.
Pas përfundimit të studimeve në vitin 1896, u dorëzua prift dhe shërbeu në Theth, Pejë, Gomsiqe, etj.
At Shtjefën Gjeçovi, ka dhënë një kontribut të jashtëzakonshëm në grumbullimin e shumë gojëdhënave dhe përgatitjen e disa monografive shkencore.
Krahas këtyre, përktheu disa vepra të rëndësishme të letërsisë botërore.
Ndihmesën më të rëndësishme e dha në fushën e etnologjisë, ku padyshim vepra monumentale mbetet “Kanuni i Lekë Dukagjinit”.
Në punën e gjatë për përgatitjen e kësaj vepre ai i mblodhi rregullat dhe kanunin nga goja e njerëzve, në të gjithë rajonet e veriut ku shërbeu si prift, dhe bëri një përmbledhje shumë interesante e cila si fillim u botua në revistën “Hylli i Dritës”.
Punoi si mësues për përhapjen e gjuhës shqipe dhe për shkak të veprimtarisë së tij patriotike dhe në shërbim të kombit shqiptar, më 14 tetor 1929, në një pritë të mirëpërgatitur prej disa kohësh, u vra nga persona të paidentifikuar në shërbim të pushtetit jugosllav.
Dokumentet bashkëlidhur, paraqesin informacione mbi veprimtarinë e At Shtjefën Gjeçovit në drejtimit të hulumtimeve arkeologjike.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
