Në kuadër të Panairit Mbarëkombëtar të Librit Akademik e Shkencor u prezantua monografia “Universiteti i Tetovës 1994/5-2004/5”.
Në aktivitet ishin të pranishëm kryetari i Akademisë së Shkencave, Skënder Gjinushi, zëvendëskryetari Vasil Tole, sekretari shkencor Shaban Sinani, kryetari i Seksionit të Shkencave Albanologjike dhe Shoqërore Gëzim Hoxha, si dhe akademikë e studiues nga Shqipëria, Kosova dhe Maqedonia e Veriut.
Kryetari i Akademisë së Shkencave, Skënder Gjinushi foli për perspektivën e një marrëveshjeje të konsoliduar me Universitetin e Tetovës në një kohë që Akademia e Shkencave e Shqipërisë ka ndërmarrë një nga nismat kryesore për hartimin e tri veprave të mëdha “Historia e shqiptarëve”, “Fjalori i madh i gjuhës shqipe” dhe “Enciklopedia”, tri botime të rëndësishme ku duhet pjesëmarrja e të gjithë specialistëve kudo që janë.
Pjesëmarrja e shqiptarëve të Maqedonisë është shumë e rëndësishme, pasi është pjesa ku historia deformohet më shumë.
Kryetari i Akademisë së Shkencave të Shqipërisë i përgëzoi autorët për monografinë që flet për një periudhë të vështirë që ka qenë ecuria e gjithë shqiptarëve të Maqedonisë dhe një institucioni paraprijës, siç është Universiteti i Tetovës në misionin e integrimit në Evropë si qytetarë të barabartë.
Prof. dr. Kushtrim Ahmeti prezantoi monografinë “Universiteti i Tetovës 1994/5-2004/5”.
Ai tha se përgatitja e monografisë ka kërkuar shumë mund dhe përkushtim, kërkime të shumta, mbledhje të materialeve e dokumenteve, punë në terren, verifikim të të dhënave, sistemim dhe redaktim të teksteve.
Nëpërmjet punës kërkimore dhe shkencore është arritur ta finalizohet siç duhet monografia gjithëpërfshirëse, e cila do t’i shërbejë kujtesës sonë, do të jetë vlerësim për ata që sakrifikuan e punuan për Universitetin e Tetovës dhe do të jetë mesazh kuptimplotë për ata që studiojnë e do të studiojnë në këtë universitet. E mesazhi është se veprat e mëdha, siç është Universiteti i Tetovës, duan punë të përbashkët, mençuri, ngulmim, sakrificë dhe vendosmëri.
Ne besojmë se monografia për Universitetin e Tetovës do t’i motivojë në të ardhmen edhe shumë autorë të tjerë që të shkruajnë libra të kësaj përmase, sepse për këtë kështjellë drite, arsimi, kulture, arti e shkence do të shkruhet për jetë e mot, . Pasi kjo monografi ka si qëllim parësor shpalosjen e një kujtese dhe historie për Universitetin e Tetovës, jemi të hapur për çdo sugjerim, me qëllim që të plotësohet gjatë ribotimeve të ardhshme.
Monografia përmban gjithsej 15 kapituj. Kapitulli i parë sjell dëshmi origjinale mbi iniciativën për themelimin dhe fillimin e punës së universitetit të parë të shqiptarëve në Republikën e Maqedonisë së Veriut.
Kapitujt e tjerë, nga i dyti deri tek i nënti hedhin dritë mbi funksionimin e Universitetit të Tetovës, rezistencën e drejtuesve të universitetit përballë presioneve shtetërore, si dhe sensibilizimin e opinionit të vendit dhe faktorit ndërkombëtar për zyrtarizimin e tij.
Kapitujt X-XI sjellin të dhëna për marrëveshjen e arritur ndërmjet udhëheqësisë së UT dhe faktorit politik i që rezultoi me zyrtarizimin e UT-së, ndryshimin dhe plotësimin e Ligjit për arsim të lartë, si dhe miratimin e Ligjit për Universitetin e Tetovës.
Në kapitujt XIII-XIV gjejmë informata lidhur me financat, objektet mësimore, administrative dhe hapësirat tjera ndihmëse gjatë viteve 1994-2004. Monografia përmbyllet me Kapitullin XV, duke vënë theksin në mëtimin e UT-së për jetësimin e misionit të nisur nga figurat kyçe të popullit shqiptar.
Kapitujt X-XI sjellin të dhëna për marrëveshjen e arritur ndërmjet udhëheqësisë së UT dhe faktorit politik i që rezultoi me zyrtarizmin e UT-së, ndryshimin dhe plotësimin e Ligjit për arsim të lartë, si dhe miratimin e Ligjit për Universitetin e Tetovës.
Ky tekst i monografisë shtrihet në 499 faqe, mbështetet në 326 fusnota dhe bibliografi prej 295 materialeve burimore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
