Pas më shumë se dy dekadash, kthehet në Teatrin Kombëtar të Operas dhe Baletit, koncerti simfonik vokal “Stabat Mater”.
Vepra e fuqishme do të vijë mjeshtërisht sot dhe nesër në ora 20:00, nga Orkestra, Kori dhe Solistët e TKOB-së, nën dirigjimin e maestros Adriano Martinolli D’ Arcy, dhe Dritan Lumshi.
“Stabat Mater Dolorosa- Nëna e pikëlluar qëndron nën këmbët e Kryqit”, këto janë fjalët e para të himnit me në qendër të shenjtën Mari, e cila vajton kryqëzimin e të birit, Krishtit.
Për të krishterët dhe për shumë kompozitorë të mëdhenj, kjo vepër, përtej përshkrimit të thjeshtë fton dhembshurisht të gjithë artdashësit të marrin pjesë në pikëllimin e kësaj nëne, si një rrugë drejt hirit dhe si pjesë e udhëtimit shpirtëror të një besimtari.
Ariet e kësaj vepre do të interpretohen nga soprano Renisa Laçka, mezzosoprano Vikena Kamenica, tenori Matias Xheli dhe basi Nicola Ciancio, në bashkëpunim me konservatorin “Umberto Giordano” të Foggia-s së Italisë.
Stabat Mater është vepër e Gioachino Rossini-t, bazuar në strukturën tradicionale të sekuencës Stabat Mater për kor dhe solistë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
