Nis edicioni i dytë i ‘Festivalit Ndërkombëtar të Bandave’ në Korçë, marrin pjesë rreth 200 artistë

Korça është kthyer edhe këtë vit në kryeqendrën e muzikës frymore, duke mirëpritur edicionin e dytë të Festivalit Ndërkombëtar të Bandave, një aktivitet që synon të shndërrohet në një traditë të rëndësishme kulturore për qytetin dhe gjithë Shqipërinë.

Rreth 200 artistë nga Shqipëria, Kosova, Maqedonia e Veriut, Mali i Zi dhe Italia janë bërë pjesë e festivalit, i cili përfshin parada artistike, koncerte në hapësirat publike të qytetit, si dhe ëorkshop-e për të rinjtë dhe të apasionuarit pas instrumenteve të frymës.

Organizatori i festivalit, Ilir Kodhima, u shpreh se qëllimi i këtij aktiviteti është të sjellë në Korçë banda me traditë nga vende të ndryshme, të krijojë ura bashkëpunimi mes artistëve dhe të promovojë muzikën frymore te brezat e rinj. 

Sipas tij, në festival marrin pjesë Banda e Qytetit të Korçës, Orkestra Frymore e Forcave të Armatosura të Shqipërisë, si dhe një bandë italiane me mbi 200 vite histori.

Pjesëmarrësit nga jashtë vendit vlerësuan organizimin dhe mikpritjen e Korçës.

 Dirigjenti i orkestrës nga Kotori i Malit të Zi, Dario Krivokapiç, u shpreh se kjo është hera e parë që ansambli i tij performon në Shqipëri dhe e cilësoi festivalin një organizim të shkëlqyer. Ai bëri të ditur se orkestra, e themeluar në vitin 1842, do të interpretojë marshime, muzikë klasike, kolona zanore filmash dhe vepra të njohura.

Edhe drejtuesi i bandës italiane, Giuseppe Buccucci, vlerësoi atmosferën dhe mikpritjen korçare. Ai tha se banda që përfaqëson ka një histori rreth 200-vjeçare dhe merr pjesë rregullisht në festivale ndërkombëtare, duke e cilësuar pjesëmarrjen në Korçë një eksperiencë të veçantë.

Ndërkohë, dirigjenti i Orkestrës Frymore të Forcave të Armatosura të Shqipërisë, major Altin Babameto, vlerësoi rolin historik të Korçës në zhvillimin e muzikës frymore shqiptare. Ai kujtoi se qyteti është vendlindja e orkestrës së parë zyrtare të shtetit shqiptar dhe e cilësoi festivalin një nismë me vlera të mëdha artistike dhe edukative.

Festivali Ndërkombëtar i Bandave vijon me parada dhe koncerte në zonën këmbësore dhe në Pazarin e Vjetër të Korçës, duke sjellë një atmosferë festive për qytetarët dhe vizitorët, ndërsa synon të forcojë traditën e muzikës frymore dhe bashkëpunimin kulturor mes vendeve pjesëmarrëse.