Dita Ndërkombëtare e Librit/ Përurohen dy fjalorë të gjuhës shqipe në Tiranë

Sot është 23 prilli, Dita Ndërkombëtare e Librit dhe të drejtave autoriale, që është një datë me kuptim simbolik për letërsinë botërore dhe jo vetëm.

Me rastin e Ditës Botërore të Librit, në Departamentin e Gjuhës Shqipe u përuruan sot dy fjalorë të gjuhës shqipe, Fjalori i gjuhës shqipe i ilustruar (për moshat 5-11 vjeç) dhe Fjalori i gjuhës shqipe (12+).

Akademikët Shezai Rrokaj e Anila Kanaj, nën prezencën e rektorit të UT-së, prof. dr. Artan Hoxha, në Ditën Ndërkombëtare të Librit prezantuan dy botime dedikuar përvetësimit të gjuhës shqipe për herë të parë, të cilët synojnë gjithashtu të ndihmojnë në mësimin e Gjuhës Shqipe në mënyrën e duhur edhe për fëmijët në Diasporë.

Përndryshe, më 23 prill, me këtë datë të vitit 1616, lidhet vdekja e dy kolosëve të letërsisë botërore: Shekspirit në Angli dhe Miguel de Servantes në Spanjë.

I pari konsiderohet si shkrimtari më i madh i të gjitha kohëve dhe vendeve, ndërsa i dyti është autori i veprës më të përkthyer në botë.

Kjo datë lidh edhe autorë tjerë në ditën e lindjes a vdekjes së tyre si: Inca Garcilaso de la Vega, Maurice Druon, Halldor Kiljan Laxness, Vladimir Nabokov, Josep Pla dhe Manuel Mejia Vallejo.

Kjo datë shënohet në botë që nga viti 2003, ndërsa është pazgjedhur në vitin 1995 me qëllim të kontribuojë në mbarë botë për të drejtat e autorit duke inkurajuar të gjithë, e në veçanti të rinjtë për të zbuluar kënaqësinë e leximit.

Kjo datë është edhe një thirrje për të rritur respektin për kontributet e pazëvendësueshme të autorëve dhe librit në progresin social dhe kulturor të njerëzimit.