Restaurohet Kalaja e Bashtovës, hap dyert për vizitorët

Kalaja e Bashtovës është kthyer në një pikë të rëndësishme të turizmit shqiptar. 

Si një nga sitet më të rëndësishme të trashëgimisë kulturore kombëtare, ajo ka hapur dyert e saj për vizitorët pas një restaurimi të plotë.

Mbrëmjen e djeshme, me këtë rast, u organizua një festë që përfshinte ekspozita të produkteve artizanale, koncert jazz, DJ kombëtar, si dhe një ekspozitë të të gjitha siteve kulturore dhe arkeologjike shqiptare të krijuara nga fëmijët e moshës adoleshente.

Ambasadori i Bashkimit Evropian në Shqipëri, Silvio Gonzato, i pranishëm në ceremoninë e inaugurimit të kalasë, theksoi se, përveç këtij siti, ka shumë shtesa të tjera përreth që janë po kaq të rëndësishme, si Kulla Veneciane në Durrës dhe Hamami i Rrogozhinës, që e bëjnë këtë rajon një destinacion kyç për turizmin.

“Ne synojmë të krijojmë mundësi që të kontribuohet në ekonomitë vendore, dhe duke rritur ekonominë vendore, ndihmojmë në zhvillimin e turizmit,” tha Gonzato.

Drejtuesja e UNOPS-it për Shqipërinë, znj. Sabine Kania, falënderoi të gjithë ekipin që mori pjesë në restaurimin e kalasë. Ajo theksoi angazhimin e Bashkimit Evropian për trashëgiminë kulturore, duke nënvizuar se janë rinovuar 21 site kulturore dhe turistike dhe se ky bashkëpunim do të vazhdojë.

Ministri i Ekonomisë, Kulturës dhe Inovacionit, Blendi Goxhaj, theksoi se Bashkimi Evropian ka dorëzuar 23 objekte të restauruara në Shqipëri dhe se është e nevojshme të investohet në ruajtjen e hapësirave publike dhe mbrojtjen e peizazheve tona.

Restaurimi i kalasë së Bashtovës, pjesë e territorit të Bashkisë Rrogozhinë, është realizuar në kuadër të programit të Bashkimit Evropian për kulturën, i financuar nga BE dhe zbatuar nga UNOPS në bashkëpunim të ngushtë me Ministrinë e Ekonomisë, Kulturës dhe Inovacionit.