Bucci: Godina historike e ish-konsullatës italiane në Shkodër kthehet në një qendër kulturore

E projektuar nga Kolë Idromeno, godina historike e ish-konsullatës italiane në Shkodër, po kthehet në një qendër kulturore.

Ambasadori i Italisë në Shqipërisë Fabrizio Bucci tha se kjo godinë nuk do funksionojë si konsullatë por do jetë një shtëpi e madhe për artin dhe kulturën. 

Mirë se vini në ish konsullatën e Shkodrës, këtë godinë të bukur që pas disa vitesh punë restauruese është thuajse gati. Ka qenë një punë e gjatë sepse është bërë një restaurim konservues, për ta ruajtur këtë godinë.

Do të ndërhyjmë në pjesën e oborrit, heqjen e murit rrethues, por donim ta paraprinim inaugurimin me këtë aktivitet që na jep shijen e asaj që do të jetë për Shkodrën pallati ‘Italia’.

Sot kam këtu edhe kryebashkiakun Spahia, i cili na ka dhënë një mbështetje të madhe për të kapërcyer disa burokraci që dy vendet tona i kanë. Brenda pak muajsh kjo godinë do të jetë gati dhe prej atij momenti i dorëzohet qytetit, sepse këtu nuk do të rihapim konsullatën italiane por do të jetë një shtëpi e madhe për artin dhe kulturën.

Ministrja e Kulturës Elva Margariti u shpreh se godina e re e ish konsullatës është një dhuratë jo vetëm për Shkodrën por për gjithë Shqipërinë për zhvillimin e artit dhe kulturës.

E ndërtuar në vitin 1861, pasi ka kryer një sërë funksionesh që nga ai diplomatik, fetar, ushtarak, kulturor, po restaurohet për t’iu dhënë përfundimisht Shkodrës e shkodranëve, por edhe kujtdo që bujt në këtë qytet mikpritës dhe djep kulture.

Kjo godinë shërbeu si konsullatë e Italisë në Shkodër nga viti 2001 deri në vitin 2013-të kur u mbyll nga shteti italian për të rihapur dyert sërish duke u quajtur tashmë “Pallati Italia”.

Kjo ndërtesë në qendër të Shkodrës shërbeu si Konsullatë e Italisë edhe përpara Luftës së Dytë Botërore ndaj mbart vlerat të mëdha historike dhe kulturore.