Është përuruar sot në Laprakë, kinemaja “Maks Velo”, e cila u projektua nga vetë arkitekti në vitet ‘70
Velo u nda nga jeta 3 javë më parë, por ëndrra e tij, për të cilën punoi gjer në ditët e fundit, para se të sëmurej, u bë sot realitet.
Kinemaja e Laprakës, të cilën arkitekti Velo e kishte projektuar që në vitet ’70, por pas viteve ’90 ishte lënë në harresë, e më pas ishte shkatërruar, për t’u zaptuar e kthyer në një hedhurinë.
Kryebashkiaku i Tiranës, Erion Veliaj, motra e Maks Velos, Diana, dhe miku i ngushtë i tij, regjisorit Kujtim Çashku, inspektuan përfundimin e punimeve të kinemasë, e cila tanimë mban edhe emrin e arkitektit të mirënjohur.
“Kur shtohet një kinema në Tiranë, për qytetin është një ditë e mrekullueshme, por është dy herë më e mrekullueshme kur i shtohet një kinema e projektuar nga Maks Velo, e cila nga sot, në nder të tij, do të quhet kinemaja “Maks Velo” në Laprakë. Sa ishte gjallë, Maksi e ndoqi këtë projekt me miqtë italianë dhe kolegët shqiptarë, madje mbaj mend një nga bisedat në atë kohë më të, kur thoshte: ‘Shiko, shumë mirë që po i bëni këto kanalizimet e ujërave të bardha e ujërave të zeza, rrugët dhe trotuaret, këndet e lodrave, por qyteti nuk jeton vetëm me llaç e tulla, qyteti jeton edhe me art, me kulturë, me filma, me teatër dhe nevojat e tjera për ushqimin shpirtëror”, u shpreh Veliaj.
Kinema “Maks Velo” do të shërbejë edhe si qendër për aktivitete kulturore dhe artistike. Ajo do u vijë në ndihmë artistëve të rinj, të cilët mund t’i përdorin këto mjedise për të shfaqur prodhimet e tyre.
Regjisori Kujtim Çashku e vlerësoi këtë nismë të Bashkisë së Tiranës, e cila gjallëron jetën kulturore nëpër lagjet e kryeqytetit. Ai theksoi se është edhe një gjest simbolik për të treguar sesa i gjatë do jetë rrugëtimi i Maks Velos. “Kam qenë dhe mbetem partizan i politikave policentriste, prej vitesh këmbëngul te kjo. Por, motivi kryesor që më solli këtu është se me Maks Velon kam kaluar një jetë. E quaj një nismë të mirëfilltë pozitive, jam i gëzuar, të gjithë duhet të jemi të gëzuar sepse me këtë gjëst simbolik kuptojmë sa i gjatë do të jetë rrugëtimi i Maks Velos”, tha regjisori Çashku.
Kinema “Maks Velo” ka jo vetëm një sallë multifunksionale, e cila do të shërbejë për aktivitete të ndryshme si kinema, shfaqje, konventa, seminare, promovime librash, teatër, por mjediset e reja të saj u vijnë në ndihmë edhe nxënësve, që studiojnë në shkollat në Laprakë, për organizimin e aktiviteteve të ndryshme kulturore, duke përmirësuar në këtë mënyrë edhe jetën artistike të zonës, e cila deri pak vite më parë ishte lënë e harruar duke mos njohur investime nga ana e shtetit. Ky rikonstruksion u mbështet financiarisht edhe nga qeveria shqiptare dhe ajo italiane.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
